🛑कांदळगाव येथे सापडलेल्या खवले मांजराला स्थानिक ग्रामस्थांकडून जीवदान.._

✍🏼लोकसंवाद /- मालवण.

मालवण तालुक्यातील कांदळगाव येथे सापडलेल्या खवले मांजराला स्थानिक ग्रामस्थांनी वन विभागाच्या ताब्यात देत जीवदान दिले. वन विभागाने या खवले मांजराला नैसर्गिक अधिवासात सोडून देण्यासाठी ताब्यात घेतले. कांदळगाव ग्रामस्थांनी केलेल्या सहकार्याबद्दल वन विभागाने आभार मानले आहेत. कांदळगाव येथे खवले मांजर जाळ्यात अडकले असल्याची माहिती स्वप्नील गोसावी यांनी वन परिमंडळ मालवणचे वनपाल श्रीकृष्ण परीट यांना दिली. त्यानंतर वनविभागाच्या अधिकारी, कर्मचाऱ्यांनी जागेवर जाऊन पाहणी केली. हे खवले मांजर कांदळगाव ग्रामस्थ संतोष पारकर गुरे चारण्यासाठी गेले असता, त्यांच्या नजरेस पडलें. त्यांनी याबाबत पार्थ डिचवलकर यांना सांगून वन कर्मचाऱ्यांच्या मदतीने सुखरुप सुटका करून मालवण, वनपाल श्रीकृष्ण परीट यांच्या ताब्यात दिले. खवले मांजर जैवविविधतेतील
महत्वाचा घटक असून समाजात असलेल्या गैरसमजामुळे दुर्मिळ होत चाललेली वन्य जीवांची प्रजात आहे. खवले मांजर वन्यजीव अधिनियम १९७२ मधील शेड्युल एकमध्ये असून त्याला डिवचणे, पकडणे, त्याची शिकार करणे हा गुन्हा आहे. हे बचाव कार्य उपवनसंरक्षक नवकिशोर रेड्डी, सहाय्यक वनसंरक्षक सुनील लाड, कुडाळ वनक्षेत्रपाल संदीप कुंभार यांच्या मार्गदर्शनाखाली श्रीकृष्ण परीट, अनिल परब, ग्रामस्थ संतोष पारकर, पार्थ डिचवलकर, नारायण मेस्त्री, लवेश आयकर तसेच यूथ बिट्स फॉर क्लायमेटचे सदस्य स्वप्नील गोसावी, दर्शन वेंगुर्लेकर आदींनी सहभाग घेतला.