🛑तळवडे शिक्षण प्रसारक मंडळाच्या निवडणुकीत ‘तळवडे पंचक्रोशी शिक्षण विकास पॅनेल’चा दणदणीत विजय;

◼️विजयानंतर नवनिर्वाचित उमेदवार यांनी भाजप प्रदेशाध्यक्ष रवींद्र चव्हाण यांची भेट घेऊन घेतले आशीर्वाद.

✒️लोकसंवाद /- सावंतवाडी.

तळवडे शिक्षण प्रसारक मंडळ, तळवडे या संस्थेच्या सन २०२६-२०३१ या कार्यकाळासाठी झालेल्या कार्यकारी मंडळ निवडणुकीत ‘तळवडे पंचक्रोशी शिक्षण विकास पॅनेल’ने दणदणीत विजय संपादन करत १२-० असा एकतर्फी निकाल नोंदविला. तब्बल ६८ वर्षांनंतर प्रथमच झालेल्या या निवडणुकीत पॅनेलच्या सर्व १२ उमेदवारांनी विजय मिळवत आपले निर्विवाद वर्चस्व सिद्ध केले.

या निवडणुकीत ‘तळवडे पंचक्रोशी शिक्षण विकास पॅनेल’ विरुद्ध ‘तळवडे शिक्षण विकास पॅनेल’ अशी चुरशीची लढत झाली. एकूण २२ उमेदवार निवडणुकीच्या रिंगणात होते. कपबशी या निवडणूक चिन्हावर निवडणूक लढविणाऱ्या ‘तळवडे पंचक्रोशी शिक्षण विकास पॅनेल’च्या सर्व १२ उमेदवारांनी मतदारांचा विश्वास संपादन करत एकतर्फी बाजी मारली. विरोधी पॅनेलला एकही जागा मिळू शकली नाही.

विजयी उमेदवारांमध्ये उमाकांत काशिनाथ भगत, विजय कृष्णाजी बुगडे, विजय बापुजी फेंद्रे, सुरेश जगन्नाथ गावडे, बाबुराव दत्ताराम गोडकर, देवेश शिवराम कावळे, भालचंद्र अनंत कांडरकर, भूषण लवू पेडणेकर, न्हानू विष्णू पेडणेकर, श्रीकृष्ण शंकर पेडणेकर, शंकर संभाजी उर्फ बाळू साळगावकर आणि संतोष विठ्ठल सावंत यांचा समावेश आहे.

या दणदणीत विजयानंतर नवनिर्वाचित उमेदवार तसेच भाजपच्या पदाधिकाऱ्यांनी भाजप प्रदेशाध्यक्ष रवींद्र चव्हाण यांची भेट घेऊन त्यांचे आशीर्वाद घेतले. यावेळी युवा नेते विनोदजी राऊळ, जिल्हा परिषद सदस्य संदीपजी गावडे, नितीन मांजरेकर, पंकज पेडणेकर, दादा परब, शंकर सावंत, विकास गावडे, दाजी तुळसकर, प्रविण लोके, दिलीप गोडकर, प्रसाद पेडणेकर, अशोक गोडकर आणि काका केरकर यांच्यासह विजयी उमेदवार व इतर मान्यवर उपस्थित होते.

प्रदेशाध्यक्ष रवींद्र चव्हाण यांनी नवनिर्वाचित उमेदवारांचे अभिनंदन करत संस्थेच्या शैक्षणिक प्रगतीसाठी एकजुटीने व प्रामाणिकपणे कार्य करण्याचे आवाहन केले. तळवडे आणि पंचक्रोशीतील विद्यार्थ्यांच्या सर्वांगीण विकासासाठी संस्थेने अधिक प्रभावी काम करावे, अशी अपेक्षाही यावेळी व्यक्त करण्यात आली.

तळवडे शिक्षण प्रसारक मंडळाची ही निवडणूक संस्थेच्या शैक्षणिक आणि प्रशासकीय वाटचालीच्या दृष्टीने अत्यंत महत्त्वाची मानली जात होती. तब्बल ६८ वर्षांनंतर झालेल्या निवडणुकीत ‘तळवडे पंचक्रोशी शिक्षण विकास पॅनेल’ला मिळालेला हा १२-० चा ऐतिहासिक विजय समर्थकांसाठी उत्साहवर्धक ठरला आहे.

नवनिर्वाचित कार्यकारी मंडळाकडून संस्थेच्या शैक्षणिक विकासाला अधिक चालना मिळावी, विद्यार्थ्यांच्या हिताला सर्वोच्च प्राधान्य मिळावे तसेच तळवडे आणि पंचक्रोशीतील शैक्षणिक क्षेत्र अधिक सक्षम व गुणवत्तापूर्ण व्हावे, अशी अपेक्षा नागरिकांकडून व्यक्त होत आहे.