🛑स्मार्ट वीज मीटर विरोधात बंड्या कोरगावकर यांनी उठविला आवाज.

✒️लोकसंवाद /- कुडाळ.

स्मार्ट वीज मीटरच्या विरोधात साळगाव ग्रामस्थांनी एकजूट दाखवत तीव्र विरोध केला आहे. साळगाव येथे झालेल्या ग्रामसभेत बंड्या कोरगावकर यांनी स्मार्ट वीज मीटर बसवू नयेत अशी मागणी करणारा ठराव मांडला. त्यांनी सांगितले की आधीच बसवण्यात आलेले स्मार्ट वीज मीटर तात्काळ काढून त्याऐवजी पूर्वीचे जुने वीज मीटर बसवावेत. या ठरावाला ग्रामसभेस उपस्थित सर्व ग्रामस्थांनी एकमुखी पाठिंबा दिला.ग्रामस्थांचे म्हणणे आहे की स्मार्ट वीज मीटर बसवल्यानंतर घरगुती वीज बिले अचानक वाढली आहेत. त्यामुळे सामान्य आणि गरीब कुटुंबांवर आर्थिक भुर्दंड पडत आहे. नाहक बिलामुळे जनतेला मोठा त्रास सहन करावा लागत आहे तसेच लाईट अचानक बंद केली जाते यामुळे गावात स्मार्ट मीटरला तीव्र विरोध होत आहे.ग्रामसभेत झालेल्या चर्चेनंतर स्मार्ट वीज मीटर बसवू नयेत आणि बसवले मीटर काढावेत असा ठराव पारित करण्यात आला. हा ठराव वीज वितरण कंपनीच्या कार्यकारी अभियंता यांना देण्याचेही ठरविण्यात आले आहे.