🛑कुडाळ न्यायालयात 20 लाखांच्या धनादेश अनादर खटल्यातून संशयित आरोपी विनायक राणे यांची सन्मानपूर्वक निर्दोष मुक्तता!

✒️लोकसंवाद /- कुडाळ.

कुडाळ येथील मे. प्रथमवर्ग न्यायदंडाधिकारी न्यायालयाने २० लाख रुपयांच्या धनादेश अनादर (चेक बाऊन्स) प्रकरणातून संशयित आरोपीची निर्दोष मुक्तता केली आहे. कुडाळ न्यायालयाचे मे. प्रथमवर्ग न्यायदंडाधिकारी यांनी दोन्ही बाजूंचा युक्तिवाद व सादर पुरावे विचारात घेऊन आरोपीच्या निर्दोष मुक्ततेचा हा महत्त्वपूर्ण निकाल दिला. या खटल्यामध्ये आरोपीच्या वतीने ॲड. विवेक मांडकुलकर यांनी कोर्टात मांडलेला कायदेशीर युक्तिवाद न्यायालयाने संपूर्णपणे ग्राह्य धरला असून, त्यांना ॲड. प्रणाली मोरे, ॲड. विनय मांडकुलकर, ॲड. वृषांग जाधव व ॲड. सुयश गवंडे यांनी सहकार्य केले.
या प्रकरणाची संक्षिप्त हकीगत अशी की, फिर्यादी सौ. मेघा शिवराम शिर्के (राहणार ऐरोली, ठाणे) यांनी मौजे सांगिर्डेवाडी, ता. कुडाळ येथील जमीन मिळकती संदर्भात संशयित आरोपी श्री. विनायक देऊ राणे (राहणार कुडाळ) यांच्याशी नोव्हेंबर २०१६ मध्ये एक साठेकरार केला होता. या व्यवहारापोटी ठरलेल्या रक्कमेची परतफेड म्हणून आरोपीने फिर्यादी यांना २० लाख रुपयांचा युनियन बँक ऑफ इंडिया, शाखा कुडाळचा धनादेश (चेक क्र. ००९७३८) दिला होता.

खटल्याची पार्श्वभूमी व अंतिम निकाल:फिर्यादी सौ. मेघा शिर्के यांनी सदर २० लाखांचा धनादेश वटवण्यासाठी स्टेट बँक ऑफ इंडियाच्या ऐरोली शाखेत जमा केला होता, परंतु आरोपीच्या खात्यात पुरेशी रक्कम नसल्याने सदर धनादेश बँकेकडून अनादरित होऊन परत आला. त्यानंतर फिर्यादीने कायदेशीर नोटीस पाठवूनही रक्कमेची पूर्तता न झाल्यामुळे कुडाळ न्यायालयात समरी केस नं. ६८/२०२० अन्वये चलनक्षम दस्तऐवज कायदा (N.I. Act) कलम १३८ नुसार फौजदारी फिर्याद दाखल केली होती.
सदर खटल्याची प्रदीर्घ सुनावणी कुडाळ येथील प्रथमवर्ग न्यायदंडाधिकारी न्यायालयात चालली. अंतिम सुनावणी दरम्यान बचाव पक्षाचे मुख्य वकील ॲड. विवेक भालचंद्र मांडकुलकर यांनी न्यायालयात बाजू मांडताना फिर्यादीच्या दाव्यातील आणि पुराव्यांमधील कायदेशीर त्रुटींवर बोट ठेवले. हा तांत्रिक व कायद्याच्या चौकटीतील युक्तिवाद मे. प्रथमवर्ग न्यायदंडाधिकारी यांनी पूर्णपणे मान्य केला.

आरोपीवरील गुन्हा सिद्ध होऊ न शकल्याने न्यायालयाने आरोपी श्री. विनायक देऊ राणे यांची या खटल्यातून सन्मानपूर्वक निर्दोष मुक्तता करण्याचे आदेश दिले.
या न्यायालयीन लढाईत आरोपीच्या वतीने ॲड. विवेक मांडकुलकर, ॲड. प्रणाली मोरे, ॲड. विनय मांडकुलकर, ॲड. वृषांग जाधव व ॲड. सुयश गवंडे या वकील पथकाने यशस्वी कामकाज पाहिले.