🛑नानेली ग्रामपंचायतीतील चोरीप्रकरणी गटविकास अधिकाऱ्यांचा संताप; “CCTV मध्ये चोरी कैद असेल तर गुन्हा दाखल करा,अहवाल सादर करा” असा कडक आदेश.

◼️CCTV फुटेज असूनही गुन्हा दाखल करण्यास विलंब का? दोषींना पाठीशी घालण्याचा प्रयत्न तर,झाला नाही ना?

✒️लोकसंवाद /- कुडाळ.

कुडाळ तालुक्यातील नानेली ग्रामपंचायतीत झालेल्या कथित चोरीप्रकरणी अखेर पंचायत समिती प्रशासनाने कठोर भूमिका घेतली असून,ग्रामपंचायती कडून तातडीने कारवाई करण्याचे आदेश दिले आहेत. पंचायत समिती कुडाळचे गटविकास अधिकारी यांनी ग्रामपंचायत अधिकारी व सरपंच यांना पाठविलेल्या पत्रात “चोरी CCTV मध्ये कैद झाली असेल तर पोलिसांत गुन्हा दाखल करून त्याची प्रत तात्काळ सादर करा,” असे स्पष्ट निर्देश दिले आहेत.

उपसरपंच प्रजेश प्रकाश धुरी यांनी केलेल्या तक्रारीच्या अनुषंगाने हे पत्र जारी करण्यात आले आहे. पत्रानुसार, २० एप्रिल २०२६ रोजी ग्रामपंचायत नानेली येथे झालेली चोरी CCTV मध्ये कैद झाल्याचा दावा करण्यात आला आहे. आरोपी बालगुन्हेगार असला तरी चोरी हा गंभीर गुन्हा असल्याने त्याकडे दुर्लक्ष करता येणार नाही, असेही पत्रात नमूद करण्यात आले आहे.

गटविकास अधिकाऱ्यांनी स्पष्ट शब्दांत सांगितले आहे की, जर ग्रामपंचायतीत चोरी झाली असेल आणि त्याचे CCTV पुरावे उपलब्ध असतील, तर संबंधितांविरुद्ध जवळच्या पोलीस ठाण्यात तातडीने गुन्हा दाखल करावा आणि केलेल्या कारवाईचा अहवाल पंचायत समितीकडे सादर करावा.या पत्रामुळे ग्रामपंचायतीने आतापर्यंत नेमकी कोणती कारवाई केली, CCTV फुटेज असूनही गुन्हा दाखल करण्यास विलंब का झाला, आणि दोषींना पाठीशी घालण्याचा प्रयत्न तर झाला नाही ना? अशा प्रश्नांची चर्चा आता जोर धरू लागली आहे.

ग्रामपंचायतीतील चोरीप्रकरणी प्रशासनाने घेतलेल्या या कठोर भूमिकेमुळे संबंधितांमध्ये खळबळ उडाली असून, पुढील काही दिवसांत या प्रकरणात महत्त्वाच्या घडामोडी होण्याची शक्यता व्यक्त केली जात आहे.