🛑कुडाळ न्यायालयात १ लाख ४३ हजारांच्या चेक बाऊन्स खटल्यातून आरोपींची सन्मानपूर्वक निर्दोष मुक्तता..

✒️लोकसंवाद /- कुडाळ.

कुडाळ येथील मे. प्रथम वर्ग न्यायदंडाधिकारी न्यायालयाने चेक बाऊन्स (नेगोशिएबल इन्स्ट्रुमेंट्स ॲक्ट) प्रकरणातील आरोपींची निर्दोष मुक्तता केली आहे. कुडाळ न्यायालयाचे मे. प्रथम वर्ग न्यायदंडाधिकारी कुलकर्णी यांनी दोन्ही बाजूंचा युक्तिवाद व सादर पुरावे विचारात घेऊन दिनांक २० जून २०२६ रोजी आरोपी मंगेश मधुकर शेलेंकर (वय ४५) व इतर यांच्या निर्दोष मुक्ततेचा हा महत्त्वपूर्ण आदेश दिला. आरोपींच्या वतीने ॲड. विवेक मांडकुलकर यांनी कोर्टात मांडलेला कायदेशीर युक्तिवाद न्यायालयाने ग्राह्य धरला असून, त्यांना ॲड. प्रणाली मोरे, ॲड. विनय मांडकुलकर, ॲड. वृषांग जाधव व ॲड. सुयश गवंडे यांनी सहकार्य केले.
या प्रकरणाची थोडक्यात हकीगत अशी की, फिर्यादी गुरुदास जगन्नाथ पेंटर (वय ४०, रा. मुळदे, ता. कुडाळ) यांनी ‘हिम्ब्स हॉलिडेज प्रायव्हेट लिमिटेड’ या पैशांची गुंतवणूक करणाऱ्या संस्थेमध्ये रक्कम गुंतवली होती. या संस्थेचे डायरेक्टर आरोपी क्र. १ मंगेश मधुकर शेलेंकर, आरोपी क्र. २ व आरोपी क्र. ३ हे होते. फिर्यादीने आपल्या हिशोबाप्रमाणे रक्कमेची मागणी केली असता, त्यांना १,४३,०००/- (एक लाख बेचाळीस हजार) रुपयांचा वैनगंगा कृष्णा ग्रामीण बँक (सध्याची विदर्भ कोकण ग्रामीण बँक), शाखा कुडाळ येथील चेक देण्यात आला होता.
फिर्यादी गुरुदास पेंटर यांनी सदर चेक देना बँक, शाखा कुडाळ येथे वटवण्यासाठी जमा केला. मात्र, आरोपींच्या खात्यात पुरेशी रक्कम उपलब्ध नसल्याने सदर चेक बँकेतून अनादरित (बाऊन्स) होऊन परत आला. यानंतर फिर्यादींनी कायदेशीर नोटीस पाठवूनही रक्कमेची पूर्तता न झाल्यामुळे कुडाळ न्यायालयात क्रिमिनल किरकोळ अर्ज क्र. १०४/२०१४ अन्वये चलनक्षम कायदा (N.I. Act) कलम १३८ नुसार फिर्याद दाखल केली होती.
सदर खटल्याची प्रदीर्घ सुनावणी कुडाळ येथील प्रथम वर्ग न्यायदंडाधिकारी न्यायालयात झाली. दिनांक २० जून २०२६ रोजी अंतिम निकाल देताना, मे. प्रथम वर्ग न्यायदंडाधिकारी कुलकर्णी यांनी कायदेशीर बाबी आणि सादर पुराव्यांचा तांत्रिक निकष तपासून आरोपींवरील आरोप सिद्ध होऊ न शकल्याने त्यांची या प्रकरणातून सन्मानपूर्वक निर्दोष मुक्तता केली. या खटल्यामध्ये आरोपींच्या वतीने ॲड. विवेक मांडकुलकर, ॲड. प्रणाली मोरे, ॲड. विनय मांडकुलकर, ॲड. वृषांग जाधव व ॲड. सुयश गवंडे या वकील पथकाने यशस्वी काम पाहिले.