🛑हरित-स्वच्छ झारापची पुन्हा चर्चा.;आता आजरा समितीही पाहणीला येणार..

✒️लोकसंवाद /- कुडाळ.

झाराप ग्रामपंचायतीच्या “हरित आणि स्वच्छ ग्राम” उपक्रमाची सध्या सर्वत्र जोरदार चर्चा सुरू असून, आता तर गावाची स्वच्छता पाहण्यासाठी आजरा पंचायत समितीतील अधिकारी आणि तज्ज्ञांची समितीच येत्या दोन दिवसात झारापमध्ये दाखल होणार असल्याची माहिती जिल्हापरिषद च्या ग्रामपंचायत विभागाचे उपमुख्य कार्यकारी अधिकारी जयप्रकाश परब यांनी दिली आहे.
गावात इतकी स्वच्छता करण्यात आली आहे की, “कचरा शोधण्यासाठीही वेगळी समिती नेमावी लागेल,” अशी मिश्किल चर्चा ग्रामस्थांमध्ये सुरू आहे. मुख्य रस्त्यांपासून वाड्यावस्त्यांपर्यंत स्वच्छता, ठिकठिकाणी वृक्षारोपण, प्लास्टिकमुक्त अभियान, नालेसफाई आणि सार्वजनिक परिसराचे सुशोभीकरण यामुळे झाराप गावाने वेगळीच ओळख निर्माण केली आहे.

ग्रामपंचायतीने ओला आणि सुका कचरा वेगळा करण्यासाठी जनजागृती मोहीम राबवली असून गावातील अनेक नागरिकही स्वच्छतेच्या कामात सक्रिय सहभागी होत आहेत. काही ग्रामस्थ तर “आता गावात पान टाकायलाही दोनदा विचार करावा लागतो,” असे हसत सांगताना दिसत आहेत.
शाळा, अंगणवाडी, ग्रामपंचायत परिसर आणि सार्वजनिक ठिकाणी सातत्याने स्वच्छता मोहीम राबविण्यात येत असल्याने गावात प्रसन्न वातावरण निर्माण झाले आहे. झाडांचे संगोपन आणि हरित उपक्रमांमुळे गाव हिरवागार दिसत असून बाहेरून येणारे पाहुणेही झारापच्या स्वच्छतेचे कौतुक करत आहेत.

आता आजरा पंचायत समितीची टीम प्रत्यक्ष पाहणीसाठी येणार असल्याने गावात उत्सुकतेचे वातावरण आहे. “आधी लोक पाहायला यायचे, आता समित्याच अभ्यासासाठी येतात,” असा विनोदी टोला काही ग्रामस्थांकडून लगावला जात आहे.
झाराप ग्रामपंचायतीच्या या उपक्रमामुळे गाव पुन्हा एकदा चर्चेचा विषय ठरले असून ग्रामस्थांमध्ये आनंदाचे वातावरण निर्माण झाले आहे.