🛑ऑनलाईन औषध विक्रीविरोधात कुडाळ तालुक्यात कडकडीत बंद; १४० मेडिकल दुकाने राहिली बंद..

✒️लोकसंवाद /- कुडाळ.

ऑनलाईन औषध विक्री करणाऱ्या बड्या कंपन्यांच्या मनमानी कारभाराच्या निषेधार्थ आणि किरकोळ औषध विक्रेत्यांच्या विविध मागण्यांसाठी आज कुडाळ तालुक्यातील तब्बल १४० मेडिकल स्टोअर्सनी कडकडीत बंद पाळला. या आंदोलनामुळे तालुक्यातील औषध विक्री व्यवस्था पूर्णपणे बंद ठेवली होती.

“सध्या ऑनलाईन औषध विक्री करणाऱ्या ज्या कंपन्या बाजारात उतरल्या आहेत, त्या सर्व धनदांडग्यांच्या आहेत. अवाजवी आणि मोठी सूट दाखवून या कंपन्यांनी आपले पाय पसरले असून, स्थानिक छोट्या व्यावसायिकांचे धंदे डबघाईला आणले आहेत,” असा घणाघाती आरोप आंदोलक औषध विक्रेत्यांच्या वतीने करण्यात आला. मुळातच किरकोळ औषध विक्रेत्यांना अत्यंत कमी मार्जिनवर काम करावे लागते, त्यातच या ऑनलाईन कंपन्यांच्या अनैतिक स्पर्धेमुळे स्थानिक डॉक्टर्स आणि औषध विक्रेत्यांवर उपासमारीची वेळ आल्याची भावना यावेळी व्यक्त करण्यात आली.
या आंदोलनादरम्यान ऑनलाईन औषध विक्रीच्या दुष्परिणामांवर तीव्र बोट ठेवण्यात आले. “ऑनलाईन औषध विक्रीवर कोणतेही कडक नियंत्रण नसल्यामुळे त्याचा गैरवापर मोठ्या प्रमाणावर वाढला आहे. तरुण पिढीकडून मोठ्या प्रमाणावर ऑनलाईन औषधांचा वापर नशा करण्यासाठी केला जात आहे. इतकेच नव्हे तर, वैद्यकीय सल्ल्याशिवाय गर्भपाताच्या गोळ्या देखील ऑनलाईन सहज उपलब्ध होत असल्याने महिलांच्या आरोग्याशी खेळ सुरू असून याचे गंभीर सामाजिक परिणाम दिसून येत आहेत,” असा खळबळजनक आरोपही विक्रेत्यांनी केला.
सरकारने त्वरित निर्णय घेण्याची मागणी
या संपूर्ण प्रकाराकडे शासनाचे लक्ष वेधण्यासाठी हा बंद पुकारण्यात आला होता. ऑनलाईन औषध विक्रीच्या या वाढत्या धोक्याची आणि स्थानिक व्यवसायिकांच्या नुकसानीची सरकारने वेळीच दखल घ्यावी; अन्यथा येत्या काळात हे आंदोलन अधिक तीव्र करण्याचा इशारा औषध विक्रेत्यांच्या संघटनेने दिला आहे.
या बंदमुळे रुग्णांची गैरसोय होऊ नये म्हणून केवळ आपत्कालीन सेवा आणि रुग्णालयातील मेडिकल सुरू ठेवण्यात आले होते. मात्र, सर्वसामान्य मेडिकल दुकाने पूर्णपणे बंद राहिल्याने या आंदोलनाचा मोठा प्रभाव तालुक्यात पाहायला मिळाला.
कुडाळ केमिस्ट अँड ड्रगिस्ट यांच्या वतीने दिपक परब. सचिव,
प्रसाद तेर्से, हरिश्चंद्र लंगवे, संदीप गावडे, राजेश तेली, प्रसाद ठाकूर, बाबुराव शेळपकर
कुडाळ केमिस्ट अँड ड्रगिस्ट संघटना आदी उपस्थित होते.