🛑जिल्हाधिकाऱ्यांच्या आदेशालाही ग्रामसेवकांचा ठेंगा? झाराप ग्रामपंचायतीत सरपंच दक्षता मेस्त्रींना केबिनबाहेरच रोखलं!”

✒️लोकसंवाद /- कुडाळ.

झाराप ग्रामपंचायतीतील सत्तासंघर्ष आज अक्षरशः शिगेला पोहोचला. सरपंच दक्षता मेस्त्री यांच्यावरील अविश्वास ठरावाला जिल्हाधिकारी तृप्ती धोडमिसे यांनी तात्पुरती स्थगिती दिल्यानंतर मेस्त्री या अधिकार स्वीकारण्यासाठी ग्रामपंचायत कार्यालयात दाखल झाल्या. मात्र, जिल्हाधिकाऱ्यांचा स्पष्ट आदेश हातात असूनही ग्रामसेवक गंगाराम वेंगुर्लेकर यांनी सरपंचांनाच केबिनबाहेर थांबवत प्रशासनातील धक्कादायक प्रकार समोर आणला.

“गटविकास अधिकाऱ्यांचे लेखी आदेश आल्याशिवाय केबिन उघडणार नाही,” अशी ठाम भूमिका घेत ग्रामसेवक गंगाराम वेंगुर्लेकर यांनी थेट जिल्हाधिकाऱ्यांच्या आदेशालाच आव्हान दिल्याची चर्चा ग्रामपंचायत परिसरात रंगली. त्यामुळे काही काळ ग्रामपंचायत कार्यालयात तणावपूर्ण आणि गोंधळाचे वातावरण निर्माण झाले.
दरम्यान, गटविकास अधिकारी मनोज भोगटे यांच्याशी फोनवर संपर्क साधण्यात आला असता त्यांनी “जिल्हाधिकाऱ्यांचा आदेश लागू आहे, सरपंचांना तात्काळ केबिन उघडून द्या,” असे स्पष्ट निर्देश दिल्याची माहिती समोर आली. मात्र, “माझ्याकडे लेखी आदेश नसताना मी जबाबदारी घेणार नाही,” अशी भूमिका घेत ग्रामसेवक गंगाराम वेंगुर्लेकर आपल्या भूमिकेवर ठाम राहिल्याने प्रशासनातील विस्कळीत कारभार पुन्हा एकदा चव्हाट्यावर आला.
झाराप ग्रामपंचायतीत वाढत चाललेला तणाव आणि कोणताही अनुचित प्रकार घडू नये यासाठी अखेर गटविकास अधिकारी मनोज भोगटे स्वतः ग्रामपंचायत कार्यालयात दाखल झाले. त्यांच्या उपस्थितीत सरपंच दक्षता मेस्त्री यांच्यासाठी केबिनचे दरवाजे उघडण्यात आले. त्यानंतर मेस्त्री यांनी पुन्हा सरपंच पदाचा अधिभार स्वीकारत आपले अधिकार पुन्हा ताब्यात घेतले.

या संपूर्ण घटनेमुळे झाराप ग्रामपंचायतीतील राजकीय संघर्ष आता अधिकच तीव्र झाला असून “जिल्हाधिकाऱ्यांचा आदेश मोठा की स्थानिक प्रशासनाचा हट्ट?” असा संतप्त सवाल नागरिकांमधून उपस्थित केला जात आहे.