🛑पेट्रोल-डिझेल संकटाच्या पार्श्वभूमीवर पंतप्रधान मोदींचा मोठा निर्णय; स्वतःचा ताफा केला कमी.

✒️लोकसंवाद /- नवी दिल्ली.

नवी दिल्ली:-देशातील जनतेला इंधन बचतीचे आवाहन करत असतानाच पंतप्रधान नरेंद्र मोदी यांनी स्वतः एक मोठा निर्णय घेतला आहे. सूत्रांनुसार, पंतप्रधान मोदींनी आपल्या ताफ्यातील गाड्यांची संख्या निम्मी केली आहे. याबाबत त्यांनी आपल्या सुरक्षेसाठी तैनात असलेल्या ‘स्पेशल प्रोटेक्शन ग्रुप’ला आदेश दिले आहेत.

पंतप्रधानांनी आपल्या ताफ्यात ५० टक्के कपात केली आहे. वडोदरा आणि आसाममध्ये हिमंता बिस्वा सरमा यांच्या शपथविधीसाठी गेलेल्या गुवाहाटी दौऱ्यात पंतप्रधानांच्या ताफ्यात ही कपात दिसून आली. ताफ्यात इलेक्ट्रिक गाड्यांचा वापर वाढवावा, मात्र त्यासाठी नवीन खरेदी करू नये, असे निर्देश एसपीजीला देण्यात आले आहेत. हिमंता बिस्वा सरमा यांच्या शपथविधी सोहळ्यादरम्यान, पंतप्रधान कार्यालयाने सर्व मुख्यमंत्र्यांना पंतप्रधानांच्या भाषणाच्या प्रती वाटल्या होत्या. यामध्ये संकटकाळात संयम राखण्याच्या आवाहनासोबतच कृती आराखड्याचाही समावेश आहे.

सूत्रांच्या माहितीनुसार, पंतप्रधानांनी आपल्या अधिकृत ताफ्यातील वाहनांची संख्या लक्षणीयरीत्या कमी केली आहे, मात्र सुरक्षेशी कोणतीही तडजोड केलेली नाही. पश्चिम आशियातील संकटाच्या पार्श्वभूमीवर नागरिकांना केलेल्या आवाहनानंतर पंतप्रधानांनी स्वतः हे पाऊल उचलले आहे. त्याचबरोबर इलेक्ट्रिक वाहनांचा अधिक वापर आणि ऑनलाइन बैठका वाढवण्याची सूचनाही करण्यात आली आहे. हैदराबादमध्ये जनतेला संबोधित करताना पंतप्रधान मोदी म्हणाले होते की, “मी देशातील प्रत्येक नागरिकाला आवाहन करतो की, त्यांनी पेट्रोल आणि डिझेलचा वापर शक्य तितका कमी करावा. मेट्रो, इलेक्ट्रिक बस आणि सार्वजनिक वाहतुकीचा जास्तीत जास्त वापर करा आणि कारपूलिंगला प्रोत्साहन द्या. ज्यांच्याकडे कार आहे, त्यांनी एकाच गाडीतून जास्तीत जास्त लोकांना सोबत नेले पाहिजे.