🛑शिक्षकांवर ऑनलाईन कामाचा वाढता ताण; वैयक्तिक मोबाईल वापरास सक्तीविरोधात शिक्षक समिती आक्रमक..

◼️“मोबाईल माझा, डेटा माझा शासनाचा त्यात वाटा नाही”.;महाराष्ट्र राज्य प्राथमिक शिक्षक समितीचा इशारा..

✒️लोकसंवाद /- समिल जळवी,सिंधुदुर्ग.

राज्यातील शिक्षकांवर दिवसेंदिवस ऑनलाईन कामाचा ताण वाढत असून, यासाठी वैयक्तिक मोबाईलचा सक्तीने वापर करावा लागत असल्याने शिक्षकांमध्ये तीव्र नाराजी व्यक्त होत आहे.महाराष्ट्र राज्य प्राथमिक शिक्षक समितीने या संदर्भात शासनाच्या धोरणावर प्रश्नचिन्ह उपस्थित करत आंदोलनाचा इशारा दिला आहे.निपुण चाचणीपासून सुरू झालेली मोबाईल वापराची सक्ती आता ‘स्कॉफ’ (SCAF) माहिती भरण्यापर्यंत वाढली असून, प्रत्येक शिक्षकाला स्वतःच्या मोबाईलमध्ये विविध ॲप डाउनलोड करून त्यावर काम करणे बंधनकारक करण्यात आले आहे.या प्रक्रियेत गुगल ड्राईव्हवर फोटो अपलोड करणे, त्याच्या लिंक तयार करून ॲपमध्ये पेस्ट करणे, तसेच 128 प्रकारच्या प्रश्नांची माहिती व संबंधित कागदपत्रे पीडीएफ स्वरूपात अपलोड करणे अशी अनेक अतिरिक्त कामे शिक्षकांवर टाकण्यात आली आहेत.शिक्षकांनी व्यक्त केलेल्या नाराजीनुसार,वैयक्तिक मोबाईलमध्ये बँकिंग, कौटुंबिक माहिती व खाजगी डेटा साठवलेला असतो.अशा परिस्थितीत शासनाच्या विविध ॲप्सचा वापर करण्याची सक्ती ही गोपनीयतेच्या दृष्टीने धोकादायक ठरू शकते. तसेच, ऑनलाईन कामासाठी लागणारा डेटा खर्च, साधनसामुग्री व तांत्रिक सुविधा शासनाकडून उपलब्ध करून दिल्या जात नसल्याची खंत शिक्षकांनी व्यक्त केली आहे.

याबाबत शिक्षक राज्य नेते उदय शिंदे राज्याध्यक्ष विजय कोंबे राज्य सरचिटणीस राजन कोरगांवकर, महाराष्ट्र राज्य प्राथमिक शिक्षक समिती यांनी स्पष्ट इशारा देताना सांगितले की, “ऑनलाईन कामासाठी आवश्यक सुविधा व साधने उपलब्ध करून देणे हे शासनाचे कर्तव्य आहे. शिक्षकांच्या वैयक्तिक मोबाईलवर सक्ती करणे अन्यायकारक असून, ही दादागिरी यापुढे सहन केली जाणार नाही.”
तसेच, शाळा स्तरावर उपलब्ध असलेले पुरावे प्रत्यक्ष तपासणीद्वारे पडताळता येऊ शकतात, असे असताना सर्व प्रक्रिया ऑनलाईन करण्यामागील उद्देश काय, असा सवालही संघटनेने उपस्थित केला आहे.

शिक्षक समितीने शासनाकडे मागणी केली आहे की, ऑनलाईन कामासाठी स्वतंत्र यंत्रणा, अधिकृत साधने व इंटरनेट सुविधा उपलब्ध करून द्याव्यात. अन्यथा, या सक्तीविरोधात राज्यभर आंदोलन छेडण्यात येईल, असा इशाराही राज्य शाखेकडून देण्यात आला असल्याचे मराठवाडा विभागीय प्रसिध्दीप्रमुख सतीश कोळी यांनी सांगितले आहे.