🛑एकनाथ शिंदेंचा मोठा निर्णय; शंभुराज देसाई यांच्याकडे गृहनिर्माण विभाग तर उदय सामत यांच्याकडे नगर विकास विभागाची जबाबदारी तर दादा भुसेंकडे सार्वजनिक बांधकाम विभागाची जबाबदारी.

✒️लोकसंवाद /- मुंबई.

राज्याच्या अर्थसंकल्पीय अधिवेशनाच्या पार्श्वभूमीवर उपमुख्यमंत्री एकनाथ शिंदे यांनी महत्त्वाचा निर्णय घेत त्यांच्या अखत्यारीतील काही महत्त्वाच्या खात्यांची जबाबदारी इतर मंत्र्यांकडे सोपवली आहे. या निर्णयामुळे राजकीय वर्तुळात चर्चांना उधाण आले आहे.

राज्यात सोमवारपासून अर्थसंकल्पीय अधिवेशनाला सुरुवात झाली असून, हे अधिवेशन २५ मार्चपर्यंत चालणार आहे.

दिवंगत उपमुख्यमंत्री आणि अर्थमंत्री अजित पवार यांच्या निधनानंतर होत असलेले हे पहिलेच अधिवेशन आहे. त्यामुळे येत्या ६ मार्च रोजी मुख्यमंत्री देवेंद्र फडणवीस राज्याचा अर्थसंकल्प सादर करणार आहेत. अधिवेशनाच्या काळात प्रशासनिक कामकाज सुरळीत सुरू राहावे यासाठी उपमुख्यमंत्री शिंदे यांनी त्यांच्या ताब्यातील खात्यांचे तात्पुरते पुनर्वाटप केले आहे. त्यानुसार नगर विकास विभागाची जबाबदारी मंत्री उदय सामंत यांच्याकडे सोपवण्यात आली आहे.

गृहनिर्माण विभाग मंत्री शंभुराज देसाई यांच्याकडे देण्यात आला असून, सार्वजनिक बांधकाम विभागाची जबाबदारी मंत्री दादा भुसे यांच्याकडे सोपवण्यात आली आहे. या संदर्भातील अधिकृत पत्र उपमुख्यमंत्री शिंदे यांनी विधानसभा अध्यक्षांना सादर केले आहे. अधिवेशनादरम्यान कामकाजावर अधिक लक्ष केंद्रित करण्यासाठी हा निर्णय घेण्यात आल्याचे सांगितले जात आहे. मात्र, शिंदे यांनी अचानक घेतलेल्या या या निर्णयामुळे राजकीय वर्तुळात विविध तर्कवितर्काना सुरुवात झाली आहे. दरम्यान, अधिवेशनाची सुरुवात राज्यपालांच्या अभिभाषणाने झाली असून, दिवंगत अजित पवार यांना श्रद्धांजली अर्पण करत शोकप्रस्ताव मांडण्यात आला. तसेच सभागृहात विविध महत्त्वाच्या विषयांवर चर्चा होणार असून, महायुती सरकारला घेरण्यासाठी विरोधकांकडूनही रणनीती आखण्यात येत आहे.