🛑प्रदेशाध्यक्ष रवींद्र चव्हाण यांच्या लेकीचा वैद्यकीय क्षेत्रात मानाचा टप्पा.

◼️सलोनी सुहासी चव्हाण एमबीबीएस उत्तीर्ण.;दीक्षांत सोहळ्यात चव्हाण कुटुंबीयांची उपस्थिती.

✒️लोकसंवाद /- सावंतवाडी.

भारतीय जनता पक्षाचे प्रदेशाध्यक्ष रवींद्र चव्हाण यांची लेक सलोनी सुहासी रविंद्र चव्हाण हिने एमबीबीएसचे शिक्षण यशस्वीरित्या पूर्ण करून डॉक्टर पदवी संपादन केली आहे. नुकताच तिचा दीक्षांत सोहळा उत्साहात पार पडला. या सोहळ्याला रवींद्र चव्हाण यांच्यासह संपूर्ण कुटुंब उपस्थित होते.सलोनी हिने वैद्यकीय शिक्षणातील कठोर परिश्रम आणि सातत्यपूर्ण अभ्यासाच्या जोरावर हा मानाचा टप्पा गाठला.

दीक्षांत सोहळ्यावेळी भावूक होत रवींद्र चव्हाण म्हणाले, “तुझा हा दीक्षांत सोहळा सहकुटुंब पाहताना तू रात्र-रात्र जागून केलेला अभ्यास, तुझं समर्पण डोळ्यांसमोर उभं राहिलं. तू तुझं स्वप्न पूर्ण केलंस, आमचा विश्वास सार्थ ठरवलास. तुझ्या या यशाचा प्रचंड अभिमान आहे.” पुढे बोलताना त्यांनी तिच्या पुढील वाटचालीस शुभेच्छा देत, “तुझ्या हातून समाजाची सेवा घडो आणि तुझे यश उत्तरोत्तर वाढत राहो,” अशा भावना व्यक्त केल्या.

या प्रसंगी सौ. सुहासी चव्हाण, डॉ. सलोनी चव्हाण, खुशी चव्हाण आदी कुटुंबीय उपस्थित होते. सलोनीच्या या यशामुळे चव्हाण कुटुंबीयांमध्ये आनंदाचे वातावरण असून सर्व स्तरांतून तिच्यावर अभिनंदनाचा वर्षाव होत आहे.