🛑१० वी व १२ वी परीक्षा कॉपीमुक्त व भयमुक्त वातावरणात पार पाडण्यासाठी प्रशासन सज्ज..

✍️लोकसंवाद /- सिंधुदुर्ग.

जिल्ह्यात उच्च माध्यमिक प्रमाणपत्र परीक्षा (इ. १२ वी) दिनांक १० फेब्रुवारी २०२६ ते १८ मार्च २०२६ या कालावधीत तर माध्यमिक शालांत प्रमाणपत्र परीक्षा (इ. १० वी) दिनांक २० फेब्रुवारी २०२६ ते १८ मार्च २०२६ या कालावधीत आयोजित करण्यात आली आहे. इयत्ता १० वी परीक्षेसाठी जिल्ह्यात ४१ परीक्षा केंद्रे असून ८,३०४ विद्यार्थी प्रविष्ट होणार आहेत. तसेच इयत्ता १२ वी परीक्षेसाठी २३ परीक्षा केंद्रे असून ८,२९२ विद्यार्थी परीक्षेला बसणार आहेत. जिल्ह्यात एकूण ९ परीरक्षक केंद्रे कार्यान्वित राहणार असल्याची माहिती शिक्षणाधिकारी (माध्यमिक) कविता शिंपी यांनी दिली आहे.

या परीक्षा कॉपीमुक्त, भयमुक्त व निकोप वातावरणामध्ये सुरळीतपणे पार पाडावी पासाठी जिल्हाधिकारी यांच्या अध्यक्षतेखाली जिल्हा दक्षता समिती स्थापन करण्यात आलेली आहे. यादक्षता समितीच्या सभेमध्ये परीक्षा केंद्राचे कामकाज सुव्यवस्थित चालावे यासाठी प्रतिबंधात्मक उपाययोजना करणेच्या अनुषंगाने कलम १४४ लागू करणे, परीक्षा केंद्राच्या परिसरात एस.टी.डी.बुध फॅक्स व झेरॉक्स मशिन, मोबाईल, रिचार्ज इ. बाबींच्या नियंत्रणाच्या दृष्टीने प्रतिबंधात्मक आदेश देणे तसेच एस.टी. महामंडळ, पोलिस यंत्रणा, पोष्ट ऑफीस कार्यालये, वीज वितरण कंपनी आरोग्य विभाग या विभांगाना परीक्षा कालावधीत दक्ष राहून सहाकार्य करण्याचे सूचना देण्यात आल्या आहेत.

तसेच परीक्षा केंद्रावर स्वच्छता, पिण्याच्या पाण्याची व्यवस्था, स्वच्छतागृह इ. सोयी उपलब्ध करुन देणेबाबत निर्देश दिले. कॉपीमुक्त अभियानासंदर्भात उपाययोजना म्हणून सर्व वर्गखोल्यांमध्ये सी.सी.टी.व्ही. बसविण्यात आलेले आहेत जिल्हास्तरावर भरारी पथकांची नियुक्ती करण्यात आलेली आहे. तसेच सोबत बैठे पथकांचे नियोजन करणेत आलेले आहे.जिल्ह्यतील सर्व परीक्षार्थीना प्रजासत्ताक दिनाच्या दिवशी जिल्हास्तरीय मुख्य कार्यक्रमात पालकमंत्री यांनी कॉपीमुक्त परीक्षा देण्याबाबत शपथ दिलेली आहे.तसेच राज्यस्तरावरुन मुख्य सचिव, महाराष्ट्र शासन यांनी ऑनलाईन बैठक घेऊन तणावमुक्त,कॉपीमुक्त व भयमुक्त वातावरणात परीक्षा पार पाडण्याबाबत आवाहन केलेले आहे.
तदनुषंगाने तणावमुक्त, कॉपीमुक्त व भयमुक्त परीक्षा पार पाडण्याकरिता संबंधित सर्व विभाग/यंत्रणा तसेच सर्व नागरिकांनी सहकार्य करावे, जिल्हा प्रशासनाच्या वतीने करण्यात आले आहे.