🛑चरण्यासाठी गेलेल्या म्हशीला तुटलेल्या विद्युतभारित वाहिनीचा स्पर्श झाल्याने जागीच मृत्यू.

🖋️लोकसंवाद /- कुडाळ.

चरण्यासाठी गेलेल्या म्हशीला जमिनीवर तुटलेल्या अवस्थेतील विद्युतभारित वाहिनीचा स्पर्श झाल्याने म्हशीचा जागीच मृत्यू झाल्याची घटना घावनळे-भोईवाडा येथे शनिवारी सायंकाळी चार वाजण्याच्या सुमारास घडली.

तेथीलच भालचंद्र अनंत सावंत यांच्या मालकीची ही म्हैस असून यात त्यांचे सुमारे एक लाख रु. चे नुकसान झाले आहे.भालचंद्र सावंत यांनी शनिवारी सायंकाळी आपली गुरे आपल्या घरापासून काही अंतरावर चरण्यासाठी सोडली होती. दरम्यान, त्याच भागात एक थ्री फेज वाहिनी तुटून पडली होती.

या विद्युतभारित वाहिनीला सावंत यांच्या म्हशीचा स्पर्श होऊन विजेच्या धक्क्याने ती म्हैस जागीच ठार झाली.अन्य काही गुरे परिसरात चरत होती. सुदैवानेच ती वाचली.
सध्या वादळी वारे वाहत असून जोरदार पाऊस कोसळत आहे. महावितरणकडून वीजवाहिन्यांची योग्य देखभाल-दुरुस्ती न केल्याने अशा घटना घडत असल्याचा आरोप स्थानिकांनी केला.वीजखांब व वीज वाहिन्या तालुक्याच्या अनेक भागातील जीर्ण झाल्या असून विद्युत महावितरणच्या निष्काळजीपणामुळे या मुक्या प्राण्याचा जीव गेला. सावंत यांना जास्तीत-जास्त नुकसान भरपाई मिळावी, अशी मागणीही स्थानिकांनी केली आहे.या घटनेनंतर विद्युत महावितरणचे कर्मचारी घटनास्थळी दाखल होऊन त्यांनी पंचनामा केला.या घटनेबाबत कुडाळ पोलिसांना माहिती मिळताच ते घटनास्थळी दाखल झाले.