🛑मळेवाडमध्ये ठाकरे सेनेला खिंडार :सोसायटी चेअरमन प्रकाश पार्सेकर यांच्यासह संचालक यांचा जिल्हाप्रमुख संजू परब यांच्या उपस्थितीत शिवसेनेत पक्षप्रवेश.

🖋️लोकसंवाद /- सावंतवाडी.

शिवसेनेचे जिल्हाप्रमुख संजू परब यांनी सावंतवाडी तालुक्यातील मळेवाड येथे उद्धव बाळासाहेब ठाकरे गटाला मोठा धक्का दिला आहे. संजू परब यांच्या नेतृत्वाखाली मळेवाडमधील शेकडो प्रमुख पदाधिकारी आणि कार्यकर्त्यांनी उबाठा गटातून शिवसेनेत जाहीर प्रवेश केला. यामुळे मळेवाडमध्ये उबाठा गटाच्या संघटनात्मक बांधणीत मोठे खिंडार पडले असून, आता रोज प्रवेश होतील व सर्वत्र भगवा फडकणार असा विश्वास संजू परब यांनी यावेळी व्यक्त केला.

माजी मंत्री तथा आमदार दीपक केसरकर यांच्या कार्यालयात हा पक्षप्रवेश सोहळा पार पडला. मळेवाड येथील सोसायटीचे चेअरमन प्रकाश पार्सेकर, व्हा. चेअरमन प्रकाश राऊत यांच्यासह सोसायटीचे संचालक गोविंद मुळीक, गोपिका रेडकर, अर्जुन तेली, धाकू शेळके, देऊ शिरसाट, रविंद्र तळवणेकर, दाजी पार्सेकर, दाजी गावडे, एकनाथ गावडे, दत्ताराम मुळीक यांनी संजू परब यांच्या उपस्थितीत शिवसेनेत प्रवेश केला.

याशिवाय, उबाठाचे युवा सेना उपजिल्हा प्रमुख सतिश नाईक, विभागप्रमुख दाजी रेडकर, महिला उप तालुकाप्रमुख साधना कळंगुटकर,ग्रा. प. सदस्य अर्जुन मुळीक आदींसह शेकडो कार्यकर्त्यांनी शिवबंधन बांधले.

प्रवेशावेळी जिल्हाप्रमुख संजू परब यांनी उपस्थितांना संबोधित केले. ते म्हणाले, आता रोज प्रवेश होणार आहेत. आगामी जिल्हा परिषद, पंचायत समिती आणि ग्रामपंचायत निवडणुकीत पूर्ण ताकदीने लढून भगवा फडकवायचा आहे. तुम्ही निश्चिंत राहा, मी तुमच्या पाठीशी खंबीरपणे उभा आहे, असा विश्वास त्यांनी व्यक्त केला. या पक्षप्रवेश सोहळ्याला शिवसेनेचे माजी जिल्हाप्रमुख अशोक दळवी, तालुकाप्रमुख नारायण उर्फ बबन राणे, परिक्षीत मांजरेकर, भारती मोरे, शर्वरी धारगळकर, गजानन नाटेकर आदींसह शिवसेनेचे पदाधिकारी आणि कार्यकर्ते मोठ्या संख्येने उपस्थित होते.