🛑घावनळ्यातील त्या बेपत्ता अल्पवयीन मुलीचा खून कुडाळ पोलिसांनी केला उघड.;प्रेमसंबंधातून खुन झाल्याचे स्पष्ट आरोपी गजाआड..

◼️गोठोस येथील २३ वर्षीय युवकाला अटक पाच दिवसांची पोलीस कोठडी.

🖋️लोकसंवाद /- समिल जळवी,कुडाळ.

कुडाळ तालुक्यातील घावनळे येथून २ ऑगस्ट २०२५ पासून बेपत्ता असलेल्या १७ वर्षीय अल्पवयीन मुलीचा खून झाला आहे.गोठोस मांडशेतवाडी येथील कुणाल कृष्णा कुंभार (वय २३) यानेच वाडोस-बाटमाचा चाळा येथून १०० मीटर अंतरावर असलेल्या एका निर्जन स्थळी गळा आवळून तिचा खून केल्याचे तब्बल दोन महिन्यांनी उघड झाले आहे.या घटनेमुळे तालुक्यात खळबळ उडाली आहे.दरम्यान संशयित आरोपी कुणाल कृष्णा कुंभार याला कुडाळ पोलिसांनी ३० सप्टेंबर २०२५ रोजी ताब्यात घेतले असून काल बुधवारी त्याला कुडाळ न्यायालयात हजर केले असता,त्याला ५ दिवसांची पोलीस कोठडी सुनावण्यात आली आहे.

याबाबत आज उपविभागीय पोलीस अधिकारी विनोद कांबळे यांनी पत्रकार परिषद घेऊन माहिती दिली.त्यांनी दिलेल्या माहिती नुसार ही अल्पवयीन मुलगी २ ऑगस्ट २०२५ पासून घावनळे गावातून बेपत्ता झाल्याची तक्रार तिच्या कुटुंबीयांनी कुडाळ पोलीस ठाण्यात दिली होती. तेव्हापासून तिचा शोध सुरू होता. ती अल्पवयीन असल्याने कुटुंबीयांनी दिलेल्या तक्रारीवरून कुडाळ पोलिसांनी अज्ञात व्यक्तीविरुद्ध अपहरणाचा गुन्हा दाखल केला होता. एका महिन्यापासून पोलीस आणि नातेवाईक तिचा शोध घेत होते. माध्यमांतूनही मुलीचा फोटो प्रसिद्ध करून माहिती देण्याचे आवाहन करण्यात आले होते. कुडाळ पोलीस ठाण्याचे पोलीस निरिक्षक राजेंद्र मगदूम यांची गुन्हा तपासासाठी स्थानिक पातळीवर विशेष पोलीस पथक स्थापन केले होते. त्या मुलीचा तिचे नातेवाईक, मित्र, मैत्रिणी, बसस्थानक, रेल्वे स्थानक, मुंबई याठिकाणी शोध घेत होते. पण ती मुलगी आणि अज्ञात आरोपी यांच्याबाबत काहीच माहिती मिळत नव्हती.

◼️भेटायला बोलावून गळा आवळला

तब्बल एक महिन्यानंतर पोलिसांच्या तपासात या मुलीचा खून केल्याची धक्कादायक माहिती पुढे आली आहे. मिळालेल्या माहितीनुसार त्या मुलीशी गोठोस-मांडशेतवाडी येथील कुणाल कृष्णा कुंभार याचे प्रेम होते. मात्र ती त्याच्या प्रेमाला प्रतिसाद देत नव्हती. पण मैत्री होती. पण ती प्रेमाला प्रतिसाद देत नसल्याने तिला संपवायचा विचार कुणालच्या डोक्यात आला. त्याने तिला भेटायला बोलावले. २ ऑगस्ट रोजी ती सावंतवाडी येथे कॉलेजमध्ये गेली होती.तिथून ती आंबेरी तिठा येथे आली. त्यांनतर कुणाल तीला मोटर सायकलवरून वाडोस-बाटमाचा चाळा येथून १०० मीटर अंतरावर असलेल्या एका निर्जन स्थळी केले बंद घराजवळ घेऊन गेला. तिथे त्याने गळा आवळून तिला ठार केले आणि तिचा मृतदेह त्या घराच्या खिडकीतून घरात टाकला. नंतर स्वतः त्या खिडकीतून आता जाऊन मृतदेह नीट झाकून ठेवला.

◼️कुणालची ‘तो मी नव्हेच’ भूमिका

दरम्यान ती मुलगी घरी न आल्याने कुटुंबीयांनी कुडाळ पोलिसात खबर दिली. कुडाळ पोलिसांनी सुद्धा तिचा शोध घेण्याच्या दृष्टीने अनेक बाजूनी तपास सुरु केला. तिचे मित्र कोण याचा शोध घेतला. तिच्या मोबाईलचे लोकेशन शोधण्याचाही प्रयत्न झाला. दरम्यान कुणाल याला सुद्धा कुडाळ पोलीस ठाण्यात बोलावण्यात आले होते. त्याच्याकडे सुद्धा चौकशी करण्यात आली. पण कुणाल हा एवढा निर्वावलेला निघाला कि ‘तो मी नव्हेच’ असंच त्याचे वागणे होते.

◼️शेवटच्या फोन कॉल ने क्लू मिळाला.

मिळालेल्या माहितीनुसार जेव्हा त्या मुलीच्या फोनचे सीडीआर तपासण्यात आले तेव्हा तिच्या फोनवर शेवटचा कॉल कुणालचा होता. त्यावरून पोलिसांचा संशय बळावला. पोलिसांनी त्याला तीन चार वेळा चौकशीसाठी बोलावले पण त्याने ताकास तूर लागू दिला नाही. शेवटी पॉलिसी खाक्या दाखवताच कुणाल पोपटासारखा बोलू लागला आणि त्याने आपणच तिला गळा आवळून मारल्याची कबुली दिली.

◼️नातेवाईकांनी मृतदेह ओळखला

पोलिसांनी कुणालसह घटनास्थळी जात खात्री केली असता अत्यंत निर्जनस्थळी असलेल्या त्या सुद्धा त्या ठिकाणी उपस्थित होते.मृतदेहावरील कपडे आहेत तसेच होते. त्यावरून मुलीच्या नातेवाईकांनी मृतदेहाची ओळख पटवली. त्यांनतर शवविच्छेदनासाठी कोल्हापूर येथे तो मृतदेह पाठवण्यात आला आहे.

◼️पाच दिवसांची पोलीस कोठडी

दरम्यान मंगळवारी सायंकाळी कुणाल कृष्णा कुंभार याला अटक करण्यात आली. आज दुपारी त्याला कुडाळ न्यायालयात हजर केले असता न्यायालयात सरकारी वकील श्रीमती मीराजे यांनी सात दिवसांच्या पोलीस कोठडीची मागणी केली. पण कुणाल कुंभार याच्या वतीने ऍड. विवेक मांडकुलकर यांनी बाजू मांडताना पोलिसांनी सात दिवसाच्या पोलीस कोठडीची केलेली मागणी योग्य नसल्याचा मुद्दा मांडला. केवळ फोन रेकॉर्ड वरून आणि संशयित आरोपीने कबुली दिली म्हणून सात दिवसांची पोलीस कोठडी देणे योग्य नसल्याचे कोर्टाच्या निदर्शनाला आणून दिले. अखेर कोर्टाने दोन्ही बाजूंचे म्हणणे ऐकून संशियत आरोपी कुणाल कृष्णा कुंभार याला रविवार ५ ऑक्टोबर पर्यंत म्हणजेच पाच दिवस पोलीस कोठडीत ठेवण्याचे आदेश दिले.

◼️तपासात अधिक बाबी उघड होतील..

दरम्यान हि हत्या करण्यामागे नेमके कारण काय असा प्रश्न विचारला असता, पोलीस उप अधीक्षक कांबळे यांनी त्याचा तपास सुरु आहे. नक्की प्रेम प्रकरणातून कि आणखी कोणत्या कारणामुळे खून झाला हे आता सांगणे शक्य नाही. तपासात या बाबी उघड होतील असे सांगितले.

हि कारवाई पोलीस अधीक्षक डॉ. मोहन दहीकर, अपर पोलीस अधीक्षक नयोमी साटम, उप विभागीय पोलीस अधिकारी विनोद कांबळे यांच्या मार्गदर्शनाखाली कुडाळ पोलीस निरीक्षक राजेंद्र मगदूम, पोलीस उपनिरीक्षक सावर्डे, पोलीस अंमलदार कृष्णा केसरकर, कृष्णा परुळेकर, प्रमोद काळसेकर, संजय कदम, योगेश वेंगुर्लेकर, महेश भोई, सखाराम भोई, आनंद पालव, महेश जळवी, रुपेश गुरव यांनी केली.