🛑आमच्याकडे हत्तीसाठी पर्यायी व्यवस्था नाही म्हणून वनताराचा प्रस्ताव.;आमदार दीपक केसरकर.

🖋️लोकसंवाद /- सावंतवाडी.

मी आता काही मंत्री नाही,माझ्याकडे कोणतेही मोठे पद नाही.परंतु मुख्यमंत्र्यांनी दिलेली समन्वयक पदाची जबाबदारी स्वीकारून रोजगारासाठी जर्मनीत जाणाऱ्या जिल्ह्यातील तरुण-तरुणींना निश्चितच न्याय देणार आहे फक्त त्या मुलांनी श्रद्धा आणि सबूरी बाळगावी,असा विश्वास आमदार तथा माजी मंत्री दीपक केसरकर यांनी आज येथे व्यक्त केला.दरम्यान दोडामार्गात स्थिरावलेल्या हत्तीमुळे गेली अनेक वर्षे मोठ्या प्रमाणात शेतकऱ्यांचे नुकसान झाले आहे. त्यामुळे त्यांना जिल्ह्यात ठेवण्यासंदर्भात किंवा त्यांचे पालन-पोषण करण्यासंदर्भात आमच्याकडे यंत्रणा नाही. त्यामुळे मी वनताराचा पर्याय सुचवला. गोवा राज्याला वाटत असेल तर त्यांनी खुशाल आपल्या राज्यात ओंकार हत्तीला ठेवावे, आमचे काहीही म्हणणे नाही, असे त्यांनी सांगितले.

श्री. केसरकर यांनी आज आपल्या निवासस्थानी पत्रकार परिषद घेऊन जर्मनीत जाणाऱ्या मुलांबाबत विरोधकांकडून झालेल्या टीकेला प्रत्युत्तर दिले. यावेळी शिवसेनेचे जिल्हाप्रमुख संजू परब, उपतालुका प्रमुख दिनेश गावडे, परीक्षित मांजरेकर, बाबू कुडतरकर, क्लेटस फर्नांडिस, प्रथमेश प्रभू, देव्या सूर्याजी, बंटी पुरोहित आदी

बंटी पुरोहित आदी पदाधिकारी उपस्थित होते. यावेळी श्री केसरकर म्हणाले, या ठिकाणी जर्मनीत मुलांना रोजगारासाठी पाठवण्यासंदर्भात तेथील कंपनी आणि राज्य शासनाचा करार झाला होता. मात्र दरम्यानच्या काळात त्या मुलांनी आवश्यक असलेली परीक्षा दिली परंतु त्या परीक्षेत ती मुले उत्तीर्ण झाली नाहीत. त्यामुळे ही प्रक्रिया लांबली. त्यामुळे या प्रकरणात कंपनीची बदनामी करणे चुकीची आहे.

संबंधित कंपनीच्या प्रमुखांनी सामाजिक भावनेपोटी येथील मुलांना स्वखर्चाने ट्रेनिंग दिले. तसेच ऑफर लेटर देण्यात आली. त्यामुळे अशा प्रकारे कोणाला बदनाम करणे चुकीचे आहे. विरोधकांना यात राजकारण दिसते. त्यामुळे ते काही टीका करताना दिसतात. त्यासाठी आवश्यक असलेली एक परीक्षा काही मुले पास झाली. मात्र दुसरी परीक्षा अद्यापपर्यंत त्यांनी यशस्वी केलेली नाही. त्यामुळे ही प्रक्रिया रेंगाळली, ही वस्तुस्थिती आहे. मात्र आता मुख्यमंत्र्यांनी दिलेल्या सूचनेनुसार मी स्वतः या योजनेची जबाबदारी घेणार आहे. हे पद छोटे असले तरी ते मी स्वीकारणार आहे आणि या मुलांवर अन्याय होऊ देणार नाही. हा सिंधुदुर्गाचा नाही तर राज्याचा प्रश्न आहे. त्यामुळे त्या ठिकाणी शासनाची बदनामी होऊ नये यासाठी सुद्धा आम्ही तितकेच कटिबद्ध आहोत. माझ्याकडे अधिकृत समन्वयक म्हणून जबाबदारी आल्यानंतर मी निश्चितच त्यात लक्ष घालेन. तूर्तास त्यासाठी आवश्यक असलेली सहमती दीड महिन्यांपूर्वी दर्शवली आहे, असे केसरकर म्हणाले.

जर्मनीत नोकरी मिळाल्यास त्याचा फायदा जिल्ह्यातील १० हजारहून अधिक मुलांना तर राज्यातील ते ४ लाख मुलांना होणार आहे. त्यामुळे नाहक विरोधकांकडे जाऊन टीकाटिप्पणी करण्यापेक्षा त्या तरुणांनी आपले भविष्यात चांगले होईल हे लक्षात ठेऊन श्रद्धा आणि सबूरी बाळगावी. प्रत्यक्षात काम करण्याची संधी मिळाल्यानंतर निश्चितच त्याचा फायदा होणार आहे. पहिल्या टप्प्यात नर्सिंगच्या मुली तर नंतरच्या टप्प्यात अन्य क्षेत्रातील मुलांना त्याठिकाणी पाठविण्यात येणार आहे. यावेळी दोडामार्गमध्ये स्थिरावलेले हत्ती वनतारामध्ये नेण्याची घोषणा केसरकर यांनी केली होती. याबाबत श्री. केसरकर यांच्यावर विरोधकांकडून टीका करण्यात आली. याबाबत केसरकर यांना छेडले असता ते म्हणाले, या ठिकाणी स्थिरावलेल्या हत्तींकडून मोठ्या प्रमाणात नुकसान होत आहे. त्यामुळे ती नुकसानी लक्षात घेता त्या हत्तींना वनतारामध्ये नेण्याचा निर्णय आम्ही घेतला आहे. परंतु आम्ही या ठिकाणी त्या हत्तींना ठेवू शकतो परंतु त्यांना मात्र ती यंत्रणा वनतारामध्ये उपलब्ध आहेत. त्यामुळे सर्वोच्च न्यायालयाने दिलेल्या निकालानुसार आम्ही त्या ठिकाणी हत्ती पाठवण्याचा निर्णय घेतला आहे. तर गोवा राज्याला हत्ती आपल्याकडे ठेवायचा असतील तर आमची कुठचीही हरकत नाही, असेही केसरकर म्हणाले.