🛑ओरोस येथील खड्ड्यामुळे झालेल्या अपघातात कुडाळ येथील महिलेचा मृत्यू.

🖋️लोकसंवाद /- कुडाळ.

रस्त्यावरील खड्डयांमुळे झालेल्या अपघातात एका महिला सरकारी अधिकाऱ्याचा दुर्दैवी मृत्यू झाला. ही घटना आज सायंकाळी ४ वाजण्याच्या सुमारास डॉन बॉस्को शाळेसमोर घडली. हेमलता धोंडू कुडाळकर (रा. कुडाळ) असे त्यांचे नाव आहे. त्या सिंधुदुर्गनगरी येथे सहाय्यक लेखाधिकारी म्हणून कार्यरत होत्या. कुडाळ नगरपंचायतीचे नगरसेवक विलास कुडाळकर यांच्या भगिनी होत्या.हेमलता कुडाळकर या जिल्हा परिषदेच्या लेखा आणि कोषागार कार्यालयात कार्यरत होत्या. पतपेढीतील काम आटोपून त्या परत येत असताना त्यांच्या बाईकचा अपघात झाला. डॉन बॉस्कोसमोरच्या रस्त्यावर असलेल्या खड्डयात त्यांची बाईक आदळली आणि बाईकवर मागे बसलेल्या हेमलता कुडाळकर रस्त्यावर फेकल्या गेल्या. यात त्यांच्या डोक्याला गंभीर दुखापत झाली. उपचारासाठी नेत असतानाच त्यांचा दुर्दैवी मृत्यू झाला. त्यांच्या मृत्यूची बातमी कळताच सिंधुदुर्गनगरीतील शासकीय कर्मचारी आणि त्यांच्या कुटुंबीयांमध्ये शोककळा पसरली. त्यांच्या मनमिळाऊ स्वभावामुळे त्या सर्वांच्या परिचयाच्या होत्या. सिंधुदुर्गनगरी परिसरातील रस्त्यांवर मोठ्या प्रमाणात खड्डे असल्याने वाहनचालकांना जीव मुठीत घेऊन प्रवास करावा लागत आहे, असेही या घटनेनंतर बोलले जात आहे.