🛑ऐन गणेशोत्सवात सिंधुदुर्गात मुसळधार पाऊस सुरु.

🖋️लोकसंवाद /- सिंधुदुर्ग.

सिंधुदुर्गातील शहरीभागासह ग्रामीण भागात पावसाने गेल्या दोन दिवसांपासून कहर केला आहे. सातत्याने पडत असलेल्या पावसामुळे सिंधुदुर्गातील बाजारपेठेवर त्याचा परिणाम झाला आहे. गणेशचतुर्थी कालावधीत पाऊस धो-धो पडत असल्याने गणेश भक्तांच्या उत्साहावर विरजण पडले आहे. गणेश दर्शनासाठी मुंबई, पुणेकर चाकरमान्यांची वर्दळ असते. पण यंदा पावसाने गणेश चतुर्थीपासून सुरुवात केली आहे. गेले चार दिवस पाऊस सातत्याने पडत आहे. पूरस्थिती निर्माण झाली आहे. सततच्या पावसामुळे नदी-नाले तुडुंब भरून वाहत आहेत. तेरेखोल नदी येथील नदीनाले तुडूंब भरून वाहत असल्याने धोकादायक बनली आहे. पाणी दुतर्फा वाहत आहे. त्यामुळे राष्ट्रीय महामार्गावर पाणी कधीही येऊ शकते, अशी स्थिती निर्माण झाली आहे.
आंबोली-बेळगाव-सावंतवाडी मार्ग हा सध्या तेरेखोल नदीपात्रामुळे धोक्याची घंटा मानली जात आहे. सावंतवाडी तालुक्यात आतापर्यंत जवळपास गेले तीन दिवस बारा इंचाहून अधिक पाऊस झाला आहे. अनेक ठिकाणी झाडे उन्मळून पडण्याच्या घटना घडल्या आहेत. मार्गावर झाडे पडून नुकसान झाले. वाहतूक काही काळ खोळंबली . तसेच गोठे, मांगर यांची पडझड होऊन नुकसान झाल्याच्या घटना घडल्या आहेत. त्याचे पंचनामे करण्यात येत असल्याचे तहसीलदार मगन असल्याचे स्पष्ट केले आहे.