🛑प्रेमसंबंधास नकार दिल्याने तरुणीवर गोळीबार.

🖋️लोकसंवाद /- पुणे.

प्रेमसंबंध नाकारल्याने संतप्त झालेल्या एका तरुणाने तरुणीवर थेट पिस्तुलातून गोळीबार केल्याची धक्कादायक घटना घडली आहे. शुक्रवारी सकाळी बाणेरमधील एका खासगी कंपनीच्या परिसरात ही धक्कादायक घटना घडली. सुदैवाने गोळी चुकवल्याने तरुणी थोडक्यात बचावली.

फिर्यादी तरुणी एमबीए शिक्षण घेत असून, बाणेरमधील एका खासगी कंपनीत इंटर्नशिप करत आहे. सकाळी सुमारे १० वाजता, ती कंपनीच्या आवारात प्रवेश करत असताना आरोपीने तिला अडवले. या वेळी आरोपीने डिलिव्हरी बॉयचा वेश परिधान केला होता. त्याने तिच्याशी संवाद साधण्याचा प्रयत्न केला. मात्र, तरुणीने बोलण्यास नकार दिला. यामुळे संतापलेल्या त्या तरुणाने तिच्या दिशेने सलग तीन गोळ्या झाडल्या.

*घटनेनंतर आरोपी फरार, पोलिसांचा शोध सुरू*

गोळीबारानंतर घाबरलेली तरुणी आरडाओरडा करू लागली. त्यानंतर परिसरातील कर्मचारी आणि सुरक्षारक्षकांनी घटनास्थळी धाव घेतली. दरम्यान, आरोपीने दुचाकीवरून पळ काढला. घटनेची माहिती मिळताच पोलिसांनी घटनास्थळी भेट दिली.

*आरोपीवर यापूर्वीही गंभीर गुन्हा*

मिळालेल्या प्राथमिक माहितीनुसार, आरोपी एका खासगी कंपनीत कार्यरत आहे. यापूर्वीही त्याच्यावर पिंपरी-चिंचवडमधील पोलीस ठाण्यात खुनाच्या प्रयत्नाचा गुन्हा दाखल आहे. घटना घडलेल्या परिसरात सीसीटीव्ही कॅमेरे नसल्याने थेट फुटेज मिळू शकलेले नाही. मात्र, पोलीस आरोपीचा शोध तीव्रगतीने घेत आहेत. लवकरच आरोपीला अटक केली जाईल, असा विश्वास पोलिसांनी व्यक्त केला आहे.