🛑वेंगुर्ला येथील गवळीवाडा जमीन प्रश्न मार्गी लागला; आमदार केसरकर यांचा सत्कार.

🖋️लोकसंवाद /- सावंतवाडी.

​वेंगुर्ला येथील गवळीवाडा येथील जमिनी आता लवकरच वहिवाटदारांच्या नावावर होणार आहेत, असा महत्त्वाचा निर्णय शासनाने घेतला आहे. या निर्णयासाठी महसूल मंत्री चंद्रशेखर बावनकुळे यांनी विशेष सहकार्य केले असून, याबाबत माजी शालेय शिक्षण मंत्री आमदार दीपक केसरकर यांनी माहिती दिली. याबद्दल गवळीवाडा येथील ग्रामस्थांनी आमदार केसरकर यांच्या कार्यालयात जाऊन त्यांचा सत्कार केला.
​यावेळी बोलताना केसरकर म्हणाले, की आता घरांची आणि जमिनींची नोंद संबंधित व्यक्तींच्या नावावर केली जाईल. यासाठी फक्त शासकीय नजराणा शुल्क भरावे लागेल.

​मल्टीस्पेशालिटी हॉस्पिटलचा प्रश्न लवकरच सुटणार:
​सावंतवाडी येथील मल्टीस्पेशालिटी हॉस्पिटलच्या जागेचा प्रश्न एका स्वाक्षरीमुळे रखडलेला होता. सामंजस्य करारातील काही अटींमुळे ही स्वाक्षरी राहिली होती. मात्र, आता यावर तोडगा काढण्यासाठी शासनाच्या पातळीवर नवीन मसुदा (ड्राफ्ट) तयार करण्यात आला आहे. लवकरच यावर सह्या होऊन हा प्रश्न कायमचा मार्गी लागेल, असा विश्वासही केसरकर यांनी व्यक्त केला. सावंतवाडीच्या राजघराण्याने या जागेसाठी नेहमीच सहकार्य केले आहे, असेही त्यांनी स्पष्ट केले.
​सावंतवाडी रेल्वे स्थानकात काही लांब पल्ल्याच्या गाड्यांना थांबा मिळावा यासाठी विशेष प्रयत्न सुरू आहेत. स्थानिक खासदार नारायण राणे यांनी या संदर्भात केंद्रीय रेल्वे मंत्र्यांशी चर्चा केली आहे. त्यामुळे लवकरच आणखी काही गाड्यांना सावंतवाडी स्थानकात थांबा मिळेल, अशी माहितीही आमदार केसरकर यांनी दिली.

​याशिवाय, रत्नसिंधू योजनेला मुदतवाढ मिळावी यासाठी आपले प्रयत्न सुरू आहेत. या योजनेतून अनेकांना रोजगार मिळाला असून, शेतकरी, मच्छीमार आणि महिला बचतगटांना याचा मोठा फायदा झाला आहे.

​आंबोली येथील जमिनींच्या वाटपाचा प्रश्नही लवकरच सुटणार
​आंबोली, गेळे आणि चौकूळ येथील जमिनींच्या सातबारावर ‘वने’ अशी नोंद असल्याने त्यांचे वाटप रखडले आहे. या प्रश्नावर तोडगा काढण्यासाठी लवकरच महसूल मंत्री चंद्रशेखर बावनकुळे यांच्यासोबत बैठक आयोजित केली आहे आणि हा प्रश्नही लवकरच कायमचा मार्गी लागेल, असा विश्वास आमदार केसरकर यांनी व्यक्त केला.​या पत्रकार परिषदेला शिवसेनेचे जिल्हा समन्वयक सचिन वालावलकर आणि सुरज परब आदी उपस्थित होते.