🛑शिवसेना ठाकरे युवासेनेकडून मालवणमध्ये युवतींसाठी मोफत रक्त तपासणी शिबिर.

🖋️लोकसंवाद /- मालवण.

शिवसेना (उद्धव बाळासाहेब ठाकरे) युवासेनेच्या वतीने महाविद्यालयीन युवतींसाठी मालवण येथे एका विशेष मोफत रक्त तपासणी शिबिराचे आयोजन करण्यात आले होते. युवासेना कार्यकारिणी सदस्य रुचिताई राऊत यांच्या वाढदिवसाचे औचित्य साधून हा सामाजिक उपक्रम घेण्यात आला. युवासेना प्रमुख आदित्य ठाकरे यांच्या नेतृत्वाखाली आणि वरुण सरदेसाई यांच्या मार्गदर्शनाखाली हा उपक्रम सिंधुदुर्ग जिल्ह्यात युवतींना संघटित करण्याच्या प्रयत्नांचा एक भाग होता.

हे शिबिर स. का.पाटील सिंधुदुर्ग कॉलेज, धुरीवाडा, मालवण येथे आयोजित करण्यात आले होते. या शिबिराचे आयोजन सिंधुदुर्ग जिल्हा विस्तारक विद्या सरमळकर आणि युवती जिल्हा अधिकारी निनाक्षी शिंदे यांच्या वतीने करण्यात आले होते. कार्यक्रमाला महाविद्यालयाचे प्राध्यापक सुमेधा नाईक, हरिदास हरगिले, राबते आणि चौघुले यांनी सहकार्य केले.
याप्रसंगी मार्गदर्शन करताना विद्या सरमळकर यांनी युवतींना युवासेनेत सहभागी होण्याचे आवाहन केले. त्यांनी युवासेना प्रमुख आदित्य ठाकरे यांची युवती सेना स्थापन करण्यामागची भूमिका स्पष्ट केली आणि समाजात अशा उपक्रमांमुळे युवतींना राजकीय व सामाजिकदृष्ट्या सकारात्मक वातावरण देण्याचा पक्षाचा उद्देश सांगितला. कार्यकारिणी सदस्य रुचिताई राऊत यांच्या माध्यमातून सिंधुदुर्ग जिल्ह्यात होत असलेल्या विविध कार्यक्रमांची माहितीही त्यांनी दिली. यावेळी, महिला आघाडी उपशहरप्रमुख विद्या फर्नडीस, राजकोट शाखाप्रमुख मंदा जोशी, युवती तालुकाप्रमुख भाग्यश्री लाकडे-खान यांच्यासह अनेक पदाधिकारी व कार्यकर्त्यांनी सहभाग घेतला. या यशस्वी कार्यक्रमासाठी युवासेना शहरप्रमुख सिद्धेश मांजरेकर व राहुल जाधव यांनी विशेष प्रयत्न केले.