🛑कोट्यावधी शासकीय निधीचा अपव्यय करणाऱ्या कार्यकर्त्यांवर आ.निलेश राणे कठोर कारवाई करणार का?कुणाल किनळकर.

🖋️लोकसंवाद /- कुडाळ.

सत्ताधारी पक्षातील ठेकेदार कार्यकर्त्याच्या माध्यमातून कुडाळ-मालवण विधानसभा मतदारसंघात करण्यात आलेली कामे निकृष्ट दर्जाची झाली आहेत,असा आरोप मनसेचे उपजिल्हाप्रमुख कुणाल किनळेकर यांनी केला आहे.दरम्यान कोट्यावधी शासकीय निधीचा अपव्यय करणाऱ्या आपल्याच कार्यकर्त्यांवर आमदार निलेश राणे कठोर कारवाई करणार का?, असा सवाल त्यांनी केला आहे. याबाबत श्री. किनळेकर यांनी प्रसिद्धी पत्रक दिले आहे.

त्यात असे म्हटले आहे की, कुडाळ शहरातील मुख्य गणेश घाट ते भंगसाळ नदीकडे जाणारा रस्ता महाराष्ट्र मेरीटाईम बोर्डामार्फत सुमारे ८० ते ९० लाख रुपये खर्च करून केवळ दीड-दोन महिन्यांपूर्वीच बांधण्यात आला होता. या रस्त्याच्या दुतर्फा नवीन बंदिस्त गटारेही बांधण्यात आली होती. मात्र पहिल्याच पावसात हे संपूर्ण काम वाहून गेल्याचे निदर्शनास आले आहे. याबाबत संबंधित विभागाकडे विचारणा केली असता, वापरलेले सिमेंट खराब दर्जाचे होते, असे अजब उत्तर अधिकारी स्वतःची जबाबदारी टाळण्यासाठी देत असल्याचा आरोप किनळेकर यांनी केला. विशेष म्हणजे हे काम करणारा पोट-ठेकेदार सत्ताधारी पक्षाच्या आमदाराचा जवळचा कार्यकर्ता असल्याने अधिकारी कारवाई करण्यास टाळाटाळ करत असल्याचा दावा ही त्यांनी केला आहे.

किनळेकर यांनी मालवण तालुक्यातील रखडलेल्या विकासकामांवरही प्रकाश टाकला. जिल्ह्याचे प्रमुख पदाधिकारी, जे काही वेळा पक्षप्रवेश घडवून आणण्यासाठी स्वखर्चाने रस्ते तयार करून देतात, त्यांनीच मुख्यमंत्री आणि प्रधानमंत्री ग्रामसडक योजनेची अनेक कामे गेली दोन-तीन वर्षे रखडवून ठेवल्याचा आरोप त्यांनी केला. यामुळे तेथील स्थानिक ग्रामस्थांना खड्डे पडलेल्या रस्त्यांमुळे त्रास सहन करावा लागत आहे. चौके-नांदरुख-आंबडोस आणि चौके-आंबेरी या मार्गावर कामांची दिरंगाई झाली असून यातील देवळी-वाघवणे-चौके रस्त्यावर मनसेने आंदोलन करून स्वखर्चाने डागडुजी केली होती असेही किनळेकर यांनी सांगितले. अशी अनेक कामे रखडलेली असल्याचे त्यांनी नमूद केले.

किनळेकर यांनी आमदार निलेश राणे यांना आवाहन केले आहे की,त्यांनी वारंवार होणाऱ्या या निकृष्ट विकासकामांबाबत प्रसंगी आपलेका र्यकर्ते किंवा पदाधिकारी असले तरी कठोर भूमिका घ्यावी.कुडाळमधील भंगसाळ नदीकडील गणेश घाट रस्त्याचे काम पूर्ववत करून घ्यावे आणि मालवण तालुक्यातील रखडलेली कामे लवकरात लवकर पूर्ण करावीत,अशी मागणी मनसेने केली आहे. जनतेला होणारा त्रास दूर करण्याची जबाबदारी आमदार निलेश राणे घेणार का? असा सवाल किनळेकर यांनी उपस्थित केला आहे.