🛑जिल्ह्यातील दोन शिक्षकांवर गैरवर्तन केल्याप्रकरणी CEO ची कारवाई.;शिक्षक आणी शिक्षिका असा समावेश.

🖋️लोकसंवाद /- सिंधुदुर्गनगरी.

जिल्हा परिषद सिंधुदुर्ग अंतर्गत कार्यरत असलेल्या जिल्ह्यातील दोन प्राथमिक शिक्षकांवर गैरवर्तन केल्या प्रकरणी प्रशासनाने कठोर कारवाई केली आहे.सावंतवाडी तालुक्यातील जि. प. शाळा तांबोळी नं. १ येथील पदवीधर शिक्षक विनायक रामचंद्र पाटील यांना सेवेतून बडतर्फ करण्यात आले आहे.

त्यांच्याविरुद्ध बांदा पोलीस ठाण्यात शाळेत मद्यपान करून मुलांना मारहाण केल्याप्रकरणी गुन्हा दाखल झाला होता.याव्यतिरिक्त, कुडाळ पोलीस ठाण्यात सार्वजनिक ठिकाणी गांजा या अंमली पदार्थाचे सेवन केल्याप्रकरणीही त्यांच्याविरुद्ध गुन्हा दाखल होता. या गंभीर गैरवर्तनामुळे जिल्हा परिषदेने त्यांना तातडीने सेवेतून निलंबित केले आहे.तसेच सावंतवाडी तालुक्यातील जिल्हा परिषद तिरोडा नं. १ येथील उपशिक्षिका सुचिता नितीन बागवे यांच्याविरुद्ध सक्तीने सेवानिवृत्तीची कारवाई करण्यात आली आहे. त्यांनी वरिष्ठांच्या आदेशांचे पालन न करणे आणि अनधिकृतपणे गैरहजर राहणे यासारख्या वर्तणुकीमुळे ही कारवाई जिल्हा परिषदेचे मुख्य कार्यकारी अधिकारी रविंद्र खेबुडकर यांनी केली आहे.जिल्हा परिषदेच्या शिक्षण विभागाने शिक्षकांनी शाळेत गैरवर्तन करणे किंवा कायद्याचे उल्लंघन करणे खपवून घेतले जाणार नाही, असा स्पष्ट संदेश या कारवाईतून दिला आहे.