बिडवलकर खून प्रकरणी ‘त्या’ दोन वाहनांपैकी एक अर्टिगा कार पोलिसांच्या ताब्यात.

लोकसंवाद /- कुडाळ.

सिद्धिविनायक उर्फ प्रकाश बिडवलकर खून प्रकरणी मृतदेहची विल्हेवाट लावण्यासाठी वापरण्यात आलेल्या दोन वाहनांपैकी संशयितांनी प्रकाश बिडवलकरचा मृतदेह कुडाळ हुन सातार्डा येथे नेताना वापरलेली आर्टिगा कार वाहन पोलिसांनी ताब्यात घेतले आहे,अशी माहिती पोलिसांनी दिली.

सिद्धिविनायक उर्फ प्रकाश बिडवलकर खून प्रकरणी संशयित आरोपी क्रमांक एक सिद्धेश अशोक शिरसाट याला वैद्यकीय करणास्तव पोलीस कोठडी अबाधित राखून तात्पुरत्या स्वरुपात न्यायालयीन कोठडीत ठेवण्याचे आदेश कुडाळ न्यायालयाने दिले आहेत.सिद्धेश शिरसाट आजारी असल्याने पोलीस कोठडीत असतानाही त्याच्या न्यायालयीन कोठडीची मागणी पोलिसांनी केली होती.

कुडाळ तालुक्यातील चेंदवण नाईकवाडी येथील सिद्धिविनायक उर्फ प्रकाश बिडवलकर याचे अपहरण करुन त्याला केलेल्या मारहाणीत त्याचा मृत्यू झाला. त्यांनतर त्याचा मृतदेह सातार्डा येथे नेऊन जाळण्यात आला आणि पुरावे नष्ट करण्याचा प्रयत्न करण्यात आला होता. दोन वर्षांपूर्वी घडलेल्या या खूनप्रकरणी निवती पोलिसांनी सिद्धेश अशोक शिरसाट (44, रा. कुडाळ), गणेश कृष्णा नार्वेकर (33, रा. माणगाव), सर्वेश भास्कर केरकर (29, रा. सातार्डा, ता. सावंतवाडी) आणि अमोल उर्फ वल्लभ श्रीरंग शिरसाट (रा. पिंगुळी, ता. कुडाळ) या चौघांना अटक केली होती. सुरुवातीला त्यांना कुडाळ न्यायालयाने 13 एप्रिल पर्यंत तीन दिवसांची पोलीस कोठडी सुनावली होती. त्याची मुदत संपताच त्यांना रविवारी 13 एप्रिल रोजी कुडाळ न्यायालयात हजार केले असता न्यायालयाने चार पैकी सिद्धेश शिरसाटसह 3 संशयित आरोपींची पोलीस कोठडीची मुदत 15 एप्रिल पर्यंत वाढवून दिली तर चौथा संशयित अमोल शिरसाट याला वैद्यकीय कारणास्तव न्यायालयीन कोठडीत ठेवण्याचे आदेश दिले होते.

परंतु संशयित आरोपी क्रमांक एक सिद्धेश अशोक शिरसाट याची प्रकृती बिघडल्याने त्याची पोलीस कोठडी अबाधित ठेवून त्याच्यावर वैद्यकीय उपचार होण्यासाठी न्यायालययीन देण्याची मागणी आज कुडाळ पोलिसांनी केली. त्या प्रमाणे सिद्धेश शिरसाट यास तात्पुरती न्यायालयीन कोठडी मिळाली आहे. सध्या तो जिल्हा रुग्णालयात उपचार घेत आहे. त्याची तब्बेत सुधारली कि पोलीस त्याला पुन्हा चौकशीसाठी ताब्यात घेऊ शकतात, अशी माहिती पोलिसांनी दिली.

दरम्यान या प्रकरणात दोन वाहनांचा वापर झाला होता. त्या पैकी प्रकाश बिडवलकर याच्या चेंदवण वरुन कुडाळ येथे केलेल्या अपहरणासाठी वापरलेले वाहन अजून पोलिसांना सापडले नसले तरी प्रकाश बिडवलकर याला मारहाण करुन त्याचा मृतदेह कुडाळ वरुन चेंदवण येथे नेण्यासाठी संशयितांनी ज्या वाहनाचा वापर केला ते वाहन मात्र पोलिसांनी ताब्यात घेतले आहे, अशी महिती तापसिक अंमलदार भीमसेन गायकवाड यांनी दिली. प्रकाश बिडवलकर खून प्रकरणात आता अजून धागेदोरे पोलीस तपासात हाती येत आहेत. यात आणखी काही व्यक्ती सहभागी आहेत का त्या दृष्टीने पोलिसांचा तपास सुरु आहे.