🛑जयगड -निवळी मुख्य मार्गांवर चाफे येथे ट्रक आणि दुचाकीचा भीषण अपघात दुचाकी स्वाराचा मृत्यू.

◼️ट्रक चालकाने दुचाकीस्वाराला साडे तीनशे ते चारशे मीटर पर्यत फरफटत नेले,जमावाने ट्रक पेटवला.

🖋️लोकसंवाद /- रत्नागिरी.

निवळी-जयगड मुख्य मार्गावरील रत्नागिरी तालुक्यात येणाऱ्या चाफे येथे मंगळवारी सकाळी साडे अकराच्या दरम्यान झालेल्या भीषण अपघातात दुचाकीस्वाराचा दुर्दैवी मृत्यू झाल्याची घटना घडली आहे.यामुळे  परिसरात एकच खळबळ उडाली असून. ट्रक आणि दुचाकीच्या भीषण अपघातात मृत्यू झालेला दुचाकीस्वार हा खंडाला वाटड येथील असून त्याचे नाव किरण पागदे आहे.घटनेनंतर संतप्त जमावाने ट्रक पेटवून दिल्याची माहिती समोर येत असून, रस्त्यावरील अवजड वाहतुकी विरोधात ग्रामस्थांनी आक्रमक पवित्रा घेतला आहे.

मंगळवारी सकाळी साडे अकरा च्या सुमारास  जयगड -निवळी मुख्य मार्गावरील चाफे गावाजवळ झालेल्या अपघातात . भरधाव वेगात येणाऱ्या ट्रकने दुचाकीला जोरदार धडक दिल्यानंतर मोटारसायकलस्वाराला तब्बल साडे तीनशे ते  चारशे फुट रस्त्यावरून  फरफटत नेल्याचे बोलले जात आहे. या भीषण धडकेत दुचाकीस्वाराचा जागीच दुर्दैवी मृत्यू झाला. मृत तरुण हा खंडाळा येथील रहिवासी असल्याचे बोलले जात आहे. अपघाताचे नेमके कारण अद्याप स्पष्ट झालेले नाही, परंतु ट्रकच्या बेदरकार चालकामुळे ही दुर्घटना घडल्याचा आरोप स्थानिकांकडून केला आहे.

*जमावाचा संतापाचा पारा चढला आणि….*

अपघाताची माहिती परिसरात काही वेळातच वाऱ्या सारखी पसरताच मोठ्या प्रमाणात लोकांनी  घटनास्थळी धाव घेतली. दुचाकीस्वाराचा मृतदेह रस्त्यावर पडलेला पाहून उपस्थित जमावाचा संतापाचा पारा चढला आणि  जमावाने ट्रक पेटवून दिला. यामुळे काही काळ परिसरात तणावाचे वातावरण निर्माण झाले. ट्रक जळत असताना धुराचे लोट आणि आगीच्या ज्वाळांनी परिस्थिती आणखीनच गंभीर बनवली . स्थानिक पोलिसांनी घटनास्थळी पोहोचून परिस्थिती नियंत्रणात आणण्याचा आटोकाट  प्रयत्न केला, परंतु ग्रामस्थांच्या संतापाचा पारा काही कमी होत नव्हता .

*अवजड वाहतुकीविरोधात आंदोलन*

या अपघाताने जयगड- निवळी मार्गावरील अवजड वाहतुकीचा प्रश्न पुन्हा एकदा ऐरणीवर आला आहे. अपघातानंतर संतप्त ग्रामस्थांनी रस्त्यावर उतरून अवजड वाहनांची वाहतूक रोखून धरली होती. या मार्गावरून सातत्याने होणारी ट्रक आणि इतर अवजड वाहनांची वाहतूक स्थानिकांसाठी डोकेदुखी ठरली आहे. रस्त्याची दुरवस्था आणि अवजड वाहनांच्या बेदरकार वाहनचालकांमुळे अपघातांचे प्रमाण वाढत असल्याचा आरोप ग्रामस्थांकडून केला आहे. “आमच्या गावातून जाणाऱ्या या वाहनांमुळे जीव धोक्यात आला असल्याचा आरोप सुद्धा केला जात आहे. प्रशासनाने यावर तातडीने उपाययोजना करावी,” अशी मागणी स्थानिकांनी लावून धरली आहे.

*अपघात संदर्भात पोलिसांचा तपास सुरू*

अपघाताची माहिती मिळताच रत्नागिरी पोलिसांनी तातडीने घटनास्थळी धाव घेतली. मृतदेह ताब्यात घेऊन शवविच्छेदना साठी पाठवण्यात आला असून, ट्रकचालकाविरुद्ध गुन्हा दाखल करण्याची प्रक्रिया सुरू आहे. दरम्यान, जळालेल्या ट्रकमुळे रस्त्यावर काही काळ वाहतूक ठप्प झाली होती, परंतु पोलिसांनी परिस्थिती हाताळून वाहतूक सुरळीत केली.

*किरण पागदे याच्या अपघाती मृत्यूने परिसरात शोककळा*

किरण पागदे याचा अपघातात मृत्यू झाल्याने  चाफे आणि खंडाळा परिसरात शोककळा पसरली आहे. मृत तरुणाच्या कुटुंबावर व मित्र मंडळीवर  दुःखाचा डोंगर कोसळला असून, त्याच्या अकाली निधनाने सर्वस्तरातून  हळहळ व्यक्त होत आहे. स्थानिकांनी प्रशासनाकडे रस्त्याच्या दुरुस्तीसह अवजड वाहतुकीवर नियंत्रण आणण्याची मागणी केली आहे.