क्षुल्लक वाद विकोपाला गेला संतापाच्या भरात पत्नीची हत्या करुन मृतदेह सुटकेसमध्ये भरला आरोपी फरार.

लोकसंवाद /-  ब्युरो न्यूज.

महाराष्ट्रातील एक दाम्पत्य बंगळुरूत कामानिमित्त शिफ्ट झाले आणि त्याच ठिकाणी पतीने पत्नीची निर्घृण हत्या केली. हत्या केल्यावर पतीने पत्नीचा मृतदेह सुटकेसमध्ये भरला आणि त्यानंतर महाराष्ट्र गाठल्याची माहिती समोर आली आहे.

गौरी आणि राकेश खेडेकर हे दाम्पत्य काही दिवसांपूर्वी महाराष्ट्रातून बंगळुरू येथे शिफ्ट झाले. त्या ठिकाणी गौरी आणि राकेश हे एका भाड्याने घेतलेल्या घरात वास्तव्य करत होते. मात्र, याच घरात राकेश खेडेकर याने आपल्या पत्नीची हत्या करुन तिचा मृतदेह एका सुटकेसमध्ये भरुन ठेवला. त्यानंतर त्याने बंगळुरू येथून पळ काढत महाराष्ट्र गाठला.

उपलब्ध माहितीनुसार, गौरी सांबरेकर आणि राकेश खेडेकर हे महाराष्ट्रातील निवासी आहेत. साधारण दोन वर्षांपूर्वी गौरी आणि राकेश खेडेकर यांचा विवाह झाला होता. गौरीने मास मिडियाचे शिक्षण घेतले आहे. तर राकेश इंजिनिअर आहे. बंगळुरू येथील एका सॉफ्टवेअर कंपनीत राकेश प्रोजेक्ट मॅनेजर म्हणून काम करत होता. कामानिमित्त राकेश आणि गौरी हे दोन महिन्यांपूर्वीच बंगळुरूत शिफ्ट झाले. हुलीमावू पोलिस स्टेशनच्या हद्दीतील दोड्डाकम्मनहल्ली येथे तिसऱ्या मजल्यावर ते भाड्याच्या अपार्टमेंटमध्ये राहत होते.

राकेश बंगळुरुतील एका कंपनीत नोकरी करत होता. तर गौरीने मास मिडियाचे शिक्षण घेतल्याने ती सुद्धा बंगळुरूत नोकरीचा शोध घेत होती. मात्र संसाराला वादाचे ग्रहण लागले. शेजाऱ्यांनी पोलिसांना सांगितलेल्या माहितीनुसार, राकेश आणि गौरी यांच्यात नेहमी वाद होत असे. क्षुल्लक कारणावरुन होणाऱ्या वादामुळे राकेश आणि गौरी दोघेही कायम मानसिक तणावात होते.

दरम्यान, याच वादातून राकेशने 25 मार्च रोजी गौरीची हत्या केली आणि तिचा मृतदेह सुटकेसमध्ये भरला. ही सुटकेस त्याने आपल्या रूममधील बाथरूममध्ये ठेवली. या कृत्यानंतर आरोपी राकेशने आपल्या घरमालकाला फोन करुन घडलेला प्रकार सांगितला. त्यानंतर त्याने बंगळुरू सोडून महाराष्ट्र गाठला. राकेशचा फोन आल्यावर घरमालक घरी पोहोचले आणि त्यांनी पोलिसांनाही घडलेला प्रकार सांगितला.

बंगळुरू येथील घरात सुटकेसमध्ये गौरीचा मृतदेह आढळून आला, तर तिचा पती राकेश हा फरार असल्याचं पोलिसांच्या लक्षात आलं. घर मालकाने याबाबत पुणे पोलिसांना कल्पना दिली. पुणे पोलिसांनी आरोपी राकेशच्या फोनवर फोन केला असता तो सुरू होता आणि महाराष्टरात असल्याचं लक्षात आल्यावर तांत्रिक पुराव्यांच्या आधारे त्याला ट्रेस करुन अटक केली.

राकेशने आपल्या वडिलांनाही फोन करुन घडलेला प्रकार सांगितला. राकेशच्या वडिसांनी माध्यमांना प्रतिक्रिया देताना सांगितले की, माझ्या मुलाने मला फोन केला. आपण पत्नीची हत्या केली. तुम्ही सर्वांना सांगा की, मी तिला मारलं आहे… असं त्याने वडिलांना सांगितले. आरोपीने अटकेपूर्वी झुरळ मारण्याचे औषध पिऊन आत्महत्या करण्याचा प्रयत्न केल्याची माहिती समोर आली आहे. पोलिसांनी त्याला उपचारासाठी पुण्यातील ससून रुग्णालयात दाखल केले आहे. सध्या त्याची प्रकृती स्थिर आहे.

राकेशने दिलेल्या माहितीनुसार, गेल्या आठवड्यात मंगळवारी रात्री जेवताना आम्हा दोघांमध्ये क्षुल्लक कारणावरुन भांडण झाले. यावेळी गौरीने त्याच्या दिशेने चाकू फेकला आणि याचा राग त्याला आला. त्याचा संताप अनावर झाला, त्याचा संयम सुटला. त्याने किचनमधील दुसरा चाकू घेऊन गौरीला दोन-तीन वेळा भोसकले. यानंतर गौरी रक्ताच्या थारोळ्यात पडली अन् तिचा जागीच मृत्यू झाला. आर्थिक अडचण, तसेच दोघांमध्ये सातत्याने होणारे वाद यामुळेच राकेश खेडेकर याने पत्नी गौरीची हत्या केल्याचं पोलीस तपासात समोर आले आहे.