दोडामार्ग तालुक्यातील माटणे येथे गॅस गळती ग्रामस्थ आक्रमक.;एम एन जी एल गॅस कंपनीचा भोंगळ कारभार चव्हाट्यावर.

लोकसंवाद /- दोडामार्ग.

दोडामार्ग तालुक्यातील माटणे येथील सीएनजी स्टेशनला गॅस पुरवठा करणाऱ्या कुडचिरे गोवा ते माटणे या पाईपलाईनला आज सकाळी आयी माटणे येथील सीमेजवळ गॅस गळती पाहावयास मिळाली, यातून आग सदृश्य धूर बाहेर येत असल्यामुळे तेथील ग्रामस्थांची भंबेरी उडाली. त्यांनी लगेचच जवळील सीएनजी गॅस स्टेशनला याची कल्पना दिल्यानंतर थोड्या वेळाने सदरचा गॅस पुरवठा बंद करण्यात आला.तरीही या ठिकाणी कोणताही जबाबदार अधिकारी आला नसल्याने तसेच येथील प्रशासकीय यंत्रणा ही पूर्णतः झोपेत असल्यामुळे या परिसरातील ग्रामस्थांचा जीविताचा मोठा प्रश्न निर्माण झाला आहे.यावेळी शिवसेना उपतालुका प्रमुख बबलू पांगम तसेच आयी गावचे सरपंच विशाल नाईक, माटणे गावचे सरपंच महादेव गवस,शाखाप्रमुख सागर गवस यांसह अनेक ग्रामस्थ यांनी या ठिकाणी येऊन सदरच्या परिस्थितीची पाहणी केली, आमच्या जीवितास धोका निर्माण करणारी ही गॅस पाईपलाईन कायम स्वरूपी बंद करा अशी मागणी करत प्रशासनाचा व या महाराष्ट्र नेचरलं गॅस लिमिटेड च्या व्यवस्थापनाचा निषेध केला. व या ठिकाणी येणाऱ्या अधिकाऱ्यांना जाब विचारू असे म्हटले.

मात्र सदर त्या ठिकाणी गॅस स्टेशनवर काम करणारे कर्मचारी वगळता कोणताही जबाबदार अधिकारी येवू न शकल्यामुळे उपस्थित आक्रमक झाले.या ठिकाणी गॅस स्टेशनवरच्या तांत्रिकी टीमने सदरची पाहणी केली असता गॅस पाईपलाईनमध्ये गळती होतं असल्याचे ते म्हणाले.

या बाबत सविस्तर वृत्त असे की,कुडचिरे येथील गॅस पाईपलाईन च्या मध्यवर्ती स्टेशनवरून दोडामार्ग तालुक्यातील माटणे या गावी असलेल्या महाराष्ट्र नॅचरल गॅस लिमिटेड या गॅस स्टेशनला सीएनजीचा पुरवठा केला जातो, यातून सिंधुदुर्ग जिल्ह्यात त्याचे वितरण होते, सदरची प्रोसेस ही पूर्णतः ऑनलाइन असून सतत २४ तास या पाईपलाईन मधून सदरच्या सीएनजी स्टेशनला गॅस पुरवठा होतो, मागील आठ दिवस माटणे येथे एका ठिकाणाहून थोडा दूर बाहेर येतो आहे तसेच या पाईपलाईन मधून कसला तरी आवाज येतो आहे याची कल्पना ग्रामस्थांना होती त्यांनी त्यासंबंधी सीएनजी स्टेशनला कळवले सुद्धा होते.मात्र सदरचे अधिकारी व तिथले कर्मचारी यांनी याकडे पूर्णतः दुर्लक्ष केले होते.आज सकाळी आठ वाजल्याच्या सुमारास यातून येणारा आग सदृश्य धूर हा मोठ्या प्रमाणात येऊन मोठा आवाज होतं असल्यामुळे येथून ये-जा करणाऱ्या ग्रामस्थांच्या ही गोष्ट लक्षात येतात त्यांनी बबलू पांगम तसेच गावचे सरपंच यांना कळविले, त्यांनी या ठिकाणी येऊन सदर गॅस स्टेशनला याबाबत कल्पना देत गॅस पुरवठा बंद केला, मात्र कोणीही जबाबदार अधिकारी या ठिकाणी न आल्यामुळे उपस्थित ग्रामस्थ आक्रमक झाले.