🛑संत राऊळ महाराज महाविद्यालयामध्ये वाचन संकल्प महाराष्ट्राचा मोठ्या उत्साहात साजरा.;लक्षवेधी ठरली ग्रंथ दिंडी.

✍🏼लोकसंवाद /- कुडाळ.

कुडाळ येथील संत राऊळ महाराज महाविद्यालयामध्ये वाचन संकल्प महाराष्ट्राचा मोठ्या उत्साहात साजरा करण्यात आला.संत राऊळ महाराज महाविद्यालय, कुडाळ व महाराष्ट्र शासन उच्च व तंत्र शिक्षण विभाग यांच्या अंतर्गत हा वाचन संकल्प महाराष्ट्राचा संपन्न झाला. १जानेवारीला सामूहिक वाचन या उपक्रमाचे आयोजन करण्यात आले.महाविद्यालयातील विद्यार्थ्यांनी,प्राचार्य, प्राध्यापक, शिक्षकेतर कर्मचारी वर्ग आदिंनी विविध विषयांच्या पुस्तकांचे सामूहिक वाचन केले.या कार्यक्रमामध्ये महाविद्यालयाच्या ग्रंथालयातील त्यांच्या आवडीची अवांतर वाचनाची पुस्तके उपलब्ध करून देण्यात आली.क्रांतीज्योती सावित्रीबाई फुले जयंती दिवशी ग्रंथ दिंडीचे आयोजन करण्यात आले.महात्मा फुले व सावित्रीबाई फुले यांच्या वेशभूषा करून वासुदेव सावंत,अंतरा पाताडे (द्वितीय वर्ष विज्ञान ) अर्चना राठोड (प्रथम वर्ष कला ) या विद्यार्थ्यांनी ज्ञानग्रंथांचे महत्त्व पटवून देणाऱ्या महात्मा जोतिराव फुले व क्रांतीज्योती सावित्रीबाई फुले यांना ग्रंथ दिंडीतून मानवंदना दिली.ही ग्रंथदिंडी लक्षवेधी ठरली. महाविद्यालयाचे सर्व विद्यार्थी प्राध्यापक प्राध्यापक केंद्र कर्मचारी या ग्रंथदिंडीत सहभागी झाले होते. ग्रंथदिंडीचा समारोप महाविद्यालयाच्या सेमिनार हॉल येथे करण्यात आला.

सर्वप्रथम राष्ट्रीय सेवा योजनेचे स्वयंसेवक व महाविद्यालय यांच्याकडून ग्रंथालय स्वच्छता अभियान राबवण्यात आले.संत राऊळ महाराज महाविद्यालयाच्या मराठी विभागाच्या वतीने दिनांक ४ जानेवारीला महाविद्यालयाच्या सेमिनार हॉल येथे वाचन संकल्प महाराष्ट्राचा या उपक्रमांतर्गत “वाचन कौशल्य कार्यशाळा “घेण्यात आली.महाविद्यालयाच्या प्राचार्य डॉ.स्मिता सुरवसे यांच्या अध्यक्षतेखाली ही कार्यशाळा संपन्न झाली.महाविद्यालयाच्या विद्यार्थ्यांनी या कार्यशाळेत उत्स्फूर्त सहभाग दर्शविला.मराठी विभागप्रमुख, कवयित्री डॉ.शरयू आसोलकर यांनी कार्यशाळेचे बीज भाषण केले. विद्यार्थ्यांना मार्गदर्शन करताना त्यांनी वाचनाचे महत्व,कसे वाचावे, का वाचावे या संदर्भात उदाहरणे देऊन वाचनाचे महत्त्व स्पष्ट केले.प्रा.संतोष वालावलकर यांनी विद्यार्थ्यांना वाचना संदर्भात मार्गदर्शन केले.तसेच त्यांनी याप्रसंगी विद्यार्थ्यांना अभिवाचन कसे करावे याचे प्रात्यक्षिक दाखवले.महाविद्यालयाच्या प्राचार्य डॉ.स्मिता सुरवसे यांनी अध्यक्षीय भाषणात विद्यार्थ्यांशी सुसंवाद साधला. विद्यार्थ्यांनी खूप वाचन केले पाहिजे तसेच मराठीतील महत्त्वाच्या ग्रंथांचे वाचन का करावे या संदर्भातही प्राचार्य सुरवसे मॅडम यांनी उदाहरणासह आपले विचार मांडले.प्रा.संतोष वालावलकर यांनी आभार मानले.९ ते १० जानेवारीपर्यंत महाविद्यालयाच्या ग्रंथालयामध्ये दोन दिवासीय ग्रंथ प्रदर्शन सर्वांसाठी खुले ठेवण्यात आले.महाविद्यालयाचे ज्येष्ठ प्राध्यापक डॉ.एस.के.पवार यांच्या शुभहस्ते ग्रंथप्रदर्शनाचे उद्घाटन झाले.बहुसंख्य विद्यार्थ्यांनी व प्राध्यापकांनी ग्रंथप्रदर्शनाचा लाभ घेतला व अभिप्राय नोंदविला. संपूर्ण उपक्रमास महाविद्यालयाच्या प्राचार्य डॉ. स्मिता सुरवसे यांनी मार्गदर्शन केले.ग्रंथपाल डॉ.साईनाथ लोखंडे, ग्रंथालय समितीचे समन्वयक डॉ. एम. एन. जांबळे व इतर सदस्य, मराठी विभाग प्रमुख डॉ. शरयू असोलकर, इंग्रजी विभाग प्रमुख डॉ. बी.ए. तुपेरे, राष्ट्रीय सेवा योजनेचे कार्यक्रम अधिकारी प्रा. यू . एम. कामत व प्रा. बी. ए. चव्हाण,प्रा.संतोष वालावलकर ,शिक्षकेतर कर्मचारी आदींच्या सकार्याने वाचन संकल्प महाराष्ट्राचा मोठ्या उत्साहात पार पडला.