🛑प्रत्येक मतदारसंघात असे महोत्सव घेतले जातील.;आमदार दिपक केसरकर.

▪️पर्यटन महोत्सव ऑफ सीझनमध्ये भरवला तर स्थानिक लोकांना रोजगार निर्मिती जास्त होईल.

*✍🏼लोकसंवाद /- सावंतवाडी.

आज जरी हा मिनी पर्यटन महोत्सव होत असला तरी सावंतवाडी पर्यटन महोत्सव यापेक्षा मोठा भव्य दिव्य होणार आहे. असे महोत्सव प्रत्येक मतदारसंघात घेतले जातील,असे माजी शिक्षण मंत्री आमदार दीपक केसरकर यांनी सांगितले.आमदार दीपकभाई केसरकर मित्र मंडळ, रोटरी क्लब, इनरव्हील क्लब, लोकमान्य मल्टीपर्पज सोसायटी आयोजित सावंतवाडी महोत्सव 2024 चे उद्घाटन माजी शिक्षणमंत्री आमदार दीपक केसरकर,आमदार निलेश राणे यांच्या हस्ते आज सायंकाळी सावंतवाडीत करण्यात आले. यावेळी आमदार दीपक केसरकर बोलत होते.

यावेळी माजी नगराध्यक्ष संजू परब, शिवसेना जिल्हाप्रमुख अशोक दळवी, तालुकाप्रमुख नारायण राणे, शहरप्रमुख खेमराज उर्फ बाबू कुडतरकर, अजय गोंदावळे, संजय आंग्रे, बँक संचालक विद्याधर परब, आबा केसरकर, प्रमोद भागवत, सुरेंद्र बांदेकर, शुभांगी सुकी, दिपाली भालेकर, उदय भोसले, भारती मोरे, अण्णा देसाई, किर्ती बोंद्रे, सुरेश गवस, किरण नाटेकर, अॅड. सायली दुभाषी, नंदू शिरोडकर उपस्थित होते.

आमदार केसरकर पुढे म्हणाले,पर्यटन महोत्सव हा ऑफ सीझनमध्ये भरवला तर स्थानिक लोकांना रोजगार निर्मिती जास्त प्रमाणात होते.मालवण मध्ये पर्यटन महोत्सव होणार आहे. त्यामुळे महिला व स्थानिकांना रोजगार निर्माण करता येईल. हंगामानुसार महोत्सव साजरा केला पाहिजे. त्यासाठी खासदार नारायण राणे यांचे मार्गदर्शन घेता येईल. उमदा तरुण नेता आमदार निलेश राणे यांचे मी नेहमी सहकार्य घेईन.यापुढे जिल्ह्यात आम्ही टीम म्हणून काम करू. मी ज्या ज्या घोषणा केल्या त्या वर्षभरात पूर्ण होतील. असे केसरकर म्हणाले.

पर्यटन महोत्सवाच्या आयोजनातून रोजगार निर्माण होतोय या उद्देशाने माजी मंत्री आमदार दीपक केसरकर यांनी सावंतवाडी पर्यटन महोत्सवाची मुहूर्तमेढ रोवली.आज प्रत्यक्षात मिनी महोत्सवातून सावंतवाडीचा महोत्सव न्याहाळता आला.सिंधुदुर्ग जिल्ह्याच्या सर्वांगीण विकासासाठी आम्ही सर्वजण एकत्र काम करू अशी ग्वाही कुडाळ मालवणचे आमदार निलेश राणे यांनी यावेळी दिली.

सावंतवाडी पर्यटन महोत्सव पहिल्यांदा येत आहे.आमदार दीपक केसरकर यांनी महोत्सव परंपरा सुरु केली. केसरकर यांनी विविध पातळ्यांवर काम केले ते काम संजू परब यांनी पुढे घेऊन जायला पाहिजे.मंत्री झाल्यानंतर केसरकर दूरदृष्टी ठेवून वाटचाल करत आहे.सावंतवाडी विधानसभा मतदारसंघात निधी आणताना कौशल्य दाखविले.सिंधुरत्न योजनेतून काम केले. सिंधुरत्न योजनेतून विद्युत जनित्र केसरकर यांच्या मुळे अनेक ठिकाणी उपलब्ध करून दिले. पर्यटन महोत्सव दिमाखदार सोहळा करतात त्याला माझेही सहकार्य राहील. असे आमदार निलेश राणे म्हणाले.

यावेळी आमदार दीपक केसरकर व आमदार निलेश राणे यांचा रोटरी क्लब, इनरव्हील क्लब, रोटरॅक्ट क्लब, दिपक केसरकर मित्र मंडळ व जेष्ठ नागरिक संघाच्या वतीने सत्कार करण्यात आला. गुरु मठकर यांनी केसरकर व राणे यांचा भेट वस्तू देऊन सत्कार करण्यात आला.

यानंतर साज ए संगीत सुप्रसिद्ध गायिका धनश्री कोरगावकर यांचा गायनाचा कार्यक्रम झाला. यावेळी आमदार दीपक केसरकर व आमदार निलेश राणे यांनी स्टॉल भेट देऊन पाहणी करत शुभेच्छा दिल्या.