🛑टूर पॅकेजच्या नावाखाली लाखोंचा गंडा.;नागरिकांच्या सतर्कतेमुळे प्रकार उघडकीस.

✍🏼लोकसंवाद /- समील जळवी, कुडाळ.

कुडाळ तालुक्यातील एका हॉटेलमध्ये टूर पॅकेजच्या नावाखाली आर्थिक गंडा घालणाऱ्या एका फसव्या कंपनीचा कुडाळ तालुक्यातील काही जागृत नागरिकांनी पर्दाफाश केला. या माध्यमातून सुमारे तीन ते चार लाख रुपयांची फसवणूक उघडकीस आली. संबंधितांनी फसव्या कंपनीला धारेवर धरल्यामुळे सुमारे ३ लाख ५ हजार रुपये रक्कम परत करावी लागली.

वल्डलॉकस् क्लब रिसॉर्ट हॉस्पिटलिटी प्रा लि. या कंपनीच्या माध्यमातून सुमारे सात ते आठ जणांचा एक ग्रुप कुडाळ तालुक्यातील महामार्गानजिकच्या एका हॉटेलमध्ये आला होता. ज्यांनी नवीन फोर व्हीलर खरेदी केली आहे अशा लोकांना फोन करून तुम्हाला गिफ्ट लागली आहे. तुम्ही या ठिकाणी असलेल्या हॉटेलमध्ये येवून तुमची गिफ्ट घेऊन चला. अशा प्रकारचें फोन जिल्ह्यातील काही जणांना आले होते. यानुसार शुक्रवारपासून हा कार्यक्रम सुरू करण्यात आला होता. यानुसार काही जण याठिकाणी आले होते. त्यांना हॉटेल मध्ये आल्यावर वेगवेगळ्या देश विदेशातील टूर चे पैकेज दाखवण्यात येत होते. यानंतर त्यांच्याकडून ४० हजार ते २ लाख पर्यतची रक्कम स्विकारण्यात आली. जवळपास चार लोकांकडून असे पैसे स्विकारण्यात आले. यानंतर असाच एक फोन जिल्ह्यातील एका व्यक्तीला आला होता.मात्र याबाबत माहिती असलेल्या या व्यक्तीने याबाबत पैसे भरण्यासाठी आलेल्या काही व्यक्तींना सावध करत याबाबत कुडाळ मधील काही लोकप्रतिनिधीना ही गोष्ट सांगितली. यानंतर लोकप्रतिनिधीनी या हॉटेलमध्ये दाखल होत संबंधित कंपनीच्या व्यक्तींना चांगलेच धारेवर धरले. दरम्यान याबाबत पोलिसही दाखल होताच संबंधित कंपनीच्या त्या कर्मचारयांची चांगलीच बोबडी वळली. संपूर्ण दिवसभर सुरू असलेल्या या प्रकारावर अखेर रात्री उशिरा पेमेंट रिफंड होण्यास सुरुवात झाल्यावर पडदा पडला. पैशाचा परतावा करण्याचा सुरवातीला टाळाटाळ करणाऱ्या कंपनीच्या व्यवस्थापनाला अखेर नमते घ्यावे लागत सुमारे ३ लाख ५ हजार रुपयांचा परतावा करावा लागला. सुमारे दोन वर्षांपूर्वी अशाच एका कंपनीने सुमारे वीस ते तीस लोकांना फसवण्याचा प्रकार उघडकीस आला होता. यानंतर आता हा दुसरा प्रकार समोर आला आहे.