🛑राष्ट्रवादी काँग्रेस अजित पवार गटाचे नेते बाबा सिद्दिकी यांचा गोळीबारात मृत्यू.;मुंबईतील वांद्रे येथील घटनेने खळबळ.

✍🏼लोकसंवाद /- मुंबई.

राष्ट्रवादी काँग्रेसचे नेते आणि राज्याचे माजी राज्यमंत्री बाबा सिद्दिकी यांचा गोळीबारात मृत्यू झाला आहे.शनिवारी रात्री वांद्रे पश्चिम येथे आमदार झिशान सिद्दिकी यांच्या ऑफिसच्या बाहेर ही घटना घडली.गोळीबारानंतर त्यांना तातडीने लिलावती रुग्णालयात दाखल करण्यात आले होते. या प्रकरणी मुंबई पोलिसांनी दोघांना ताब्यात घेतले आहे. विशेष म्हणजे १५ दिवसांपूर्वी त्यांना वाय (Y) दर्जाची सुरक्षा देण्यात आली होती. SRA प्रकल्पातून हा गोळीबार झाल्याची शक्यता पोलिसांनी व्यक्त केली आहे. खेरवाडी सिग्नल जवळ ही घटना घडल्याचे समजते. बाबा सिद्दिकींवर तिघांनी गोळीबार केल्याचे वृत्त आहे.दरम्यान या गोळीबार प्रकरणी पोलिसांनी दोघांना ताब्यात घेतले असून त्यांची चौकशी सुरू आहे.तर एक फरार आहे.

बाबा सिद्दिकी हे वांद्रे पश्चिम विधानसभा मतदारसंघाचे १९९९, २००४, २००९ असे सलग तीन वेळा आमदार होते. त्यांनी राज्याचे अन्न व नागरी पुरवठा, कामगार राज्यमंत्री म्हणून काँग्रेसच्या सरकारमध्ये काम केले होते.आमदार होण्याआधी बाबा सिद्दिकी हे १९९२ आणि १९९७ अशी दोन टर्म नगरसेवक होते. याच वर्षी म्हणजे ८ फेब्रुवारी २०२४ रोजी त्यांनी काँग्रेसमधून राजीनामा दिला होता. त्यानंतर १२ फेब्रुवारी रोजी त्यांनी अजित पवार यांच्या राष्ट्रावादी काँग्रेसमध्ये प्रवेश केला होता. बाबा सिद्दिकी यांचे मुळ नाव झियाउद्दीन सिद्दिकी असे आहे. १९७७ साली अगदी लहान वयात त्यांनी काँग्रेसमध्ये प्रवेश केला होता. सुरुवातीच्या काळात ते विद्यार्थी चळवळीमध्ये होते. ८० मध्ये त्यांना वांद्रे युवक काँग्रेसचे सरचिटणीस करण्यात आले तर चार वर्षांनी ते अध्यक्ष झाले. १९८८ साली ते मुंबई युवक काँग्रेसचे अध्यक्ष झाले.

*अभिषेक घोसाळकर यांच्यावरील गोळीबाराची आठवण..*

राजकीय नेत्यावर गोळीबार झाल्याची मुंबईतील गेल्या काही महिन्यातील ही दुसरी घटना आहे. याआधी फेब्रुवारी महिन्यात शिवसेनेचे माजी नगरसेवक अभिषेक घोसाळकर यांच्यावर फेसबुक लाईव्ह करताना गोळीबार करण्यात आला होता. त्यांच्यावर ५ गोळ्या झाडण्यात आल्या होत्या, यात घोसाळकर यांचा मृत्यू झाला होता.

बाबा सिध्दीकी यांच्या हत्येनंतर विरोधी पक्षनेते विजय वड्डेटीवार यांनी काँग्रेस पक्षात असताना सहकारी म्हणून आम्ही पक्षासाठी सोबत काम केले आहे. बाबा सिद्दिकी यांना भावपूर्ण श्रद्धांजली अर्पण करतो,असे ट्विट करीत राज्यातील मोठ्या नेत्यावर असा गोळीबार होतो. महाराष्ट्राचा उत्तर प्रदेश झाला आहे असं आम्ही सतत सांगतोय. मुंबई शांत होती पण अलीकडे मुंबईत या घटना वाढत आहे. मुंबईत पोलिसांचा धाक उरला नाही कारण या सरकारनेच गुन्हेगारांना पाठीशी घातले आहे. गुन्हेगारांना सरकार वाचवते, एवढ्या मोठ्या नेत्यावर गोळीबार होतो ही गंभीर बाब आहे याची चौकशी झाली पाहिजे,असे म्हटले आहे.