🛑कुडाळ शहरातील शिवाजी पार्क येथुन चोरीला गेलेली बुलेट गडहिंग्लज येथुन पोलिसांच्या ताब्यात.

✍🏼लोकसंवाद /- कुडाळ.

कुडाळ शहरातील शिवाजी पार्क येथुन चोरीला गेलेली बुलेट गाडी अखेर गडहिंग्लज- कोल्हापूर येथून स्थानिक गुन्हा अन्वेषण विभागाच्या पथकाला ताब्यात घेण्यात यश आले आहे.तसेच या चोरीतील संशयित ज्ञानेश्वर हेमंत जाधव (२२.रा.कसबा,गडहिंग्लज-कोल्हापूर) व ओमकार दिनकर गायकवाड (२०, रा. कसबा, गडहिंग्लज- कोल्हापूर) या दोघांनाही ताब्यात घेत शुक्रवारी पहाटे अटक करण्यात आली.स्थानिक गुन्हा अन्वेषण विभाग व कुडाळ पोलिसांनी संयुक्तपणे तपास करताना यश आले. या संशयितांना कुडाळ येथील न्यायालयात हजर केले असता,न्यायालयाने त्या दोघांनाही न्यायालयीन कोठडी दिली आहे.या विषयी अधिक माहिती अशी की

कुडाळ शहरातील तुपटवाडी येथील शिवाजी पार्क या गृहनिर्माण प्रकल्पात राहणारे कुडाळ पोलीस ठाण्याचे हवालदार अनिल लवू पाटील यांच्या मालकीची बुलेट ही १२ जून २०२४ रोजी रात्री ९.३० ते १३ जून रोजी सकाळी ९ या मुदतीत चोरीला गेली होती.याबाबत पाटील यांनी कुडाळ पोलीस ठाण्यात दिलेल्या तक्रारीनुसार अज्ञात चोरट्या विरोधात गुन्हा दाखल करण्यात आला होता.या चोरीबाबत कुडाळ पोलीस व स्थानिक गुन्हा अन्वेषण शाखा सिंधुदुर्ग हे संयुक्तपणे तपास करीत होते.दरम्यान,पोलीस निरीक्षक राजेंद्र मगदूम यांच्या मार्गदर्शनाखाली या गुन्ह्याचा तपास करणारे कुडाळचे हवालदार सचिन गवस यांनी हवालदार बस्त्याव भुतेलो,अनिल पाटील यांच्या मदतीने तपास सुरू केला.त्यांना हवालदार प्रीतम कदम व कृष्णा केसरकर यांनी सहाय्य केले.

कुडाळ शहरातील बस स्थानकासमोरील एका हॉटेल समोरील सीसीटीव्ही फूटेज तपासले.त्यात गडहिंग्लज येथून भाजी घेऊन कुडाळला येणाऱ्या टेम्पोतून उतरून एक व्यक्ती शिवाजी पार्कच्या दिशेने चालत जाताना दिसला होता.पोलिसांनी या टेम्पो मालकाचा कसून शोध घेत त्याच्याकडे तपास केला.यावेळी येथील एका लॉ कॉलेजच्या एका विद्यार्थ्याला आपण त्या ठिकाणी आणून सोडल्याचे त्या टेम्पो मालकाने सांगितले.त्यानुसार पोलिसांनी या लॉ कॉलेजच्या विद्यार्थ्यांचा शोध घेतला.तर हा विध्यार्थी शिवाजी पार्क याच गृहप्रकल्प येथे,भाडेकरू म्हणून राहत असल्याची माहिती समोर आली.त्याच एरियात राहून चोरीच्या उद्देशाने पाळत ठेऊन त्याने चोरी करण्याचा सापळा रचला हे निदर्शनास आले.संबंधित विद्यार्थी हा कोल्हापूर जिल्हयातील गडहिंग्लज तालुक्यातील असल्याचे निष्पन्न झाले.याकामी स्थानिक गुन्हा अन्वेषण शाखेचे निरीक्षक हेमचंद्र खोपडे यांच्या मार्गदर्शनाखाली उपनिरीक्षक समीर भोसले,उपनिरीक्षक रामचंद्र शेळके, सहाय्यक उपनिरीक्षक गुरुनाथ कोयंडे, हवालदार प्रकाश कदम,बस्त्याव डिसोजा, चंद्रकांत पालकर यांनी गडहिंग्लज परिसरात जात या संशयितांचा शोध घेत काल मध्यरात्रीनंतर त्यांना ताब्यात घेतले.तसेच बुलेटही हस्तगत केली.ज्ञानेश्वर जाधव हा लॉ कॉलेजचा विद्यार्थी आहे.