🛑मारहाण प्रकरणातील उभादांडा – कुर्लेवाडीतील संशयीत आरोपींची वेंगुर्ले न्यायाधीशांनी केली निर्दोष मुक्तता..

✍🏼लोकसंवाद /- वेंगुर्ला.

मारहाण प्रकरणातील संशयीत आरोपी रामकृष्ण व्दारकानाथ कुर्ले वगैरे ६(सर्व राहणार उभादांडा कुर्लेवाडी) यांची वेंगुर्ला न्यायालयाचे न्यायाधीश डी.वाय.रायरीकर यांनी सबळ पुराव्या अभावी निर्दोष मुक्तता केलेली आहे. संशयीत आरोपीच्या वतीने ॲड. मनीष सातार्डेकर व ॲड. अक्षदा राऊळ यांनी काम पाहीले.

वेंगुर्ला तालुक्यातील उभादांडा, कुर्लेवाडी येथील फिर्यादी विलास विष्णु कुर्ले (७० राहणार कुर्लेवाडी, उभादांडा) याने वेंगुर्ला पोलिस ठाण्यात अशी तक्रार दिली होती कि, दि.२ ऑगस्ट २०१८ रोजी सकाळी १०.०० वाजता फिर्यादी आपल्या कामगाराला घेवुन आपल्या बागेतील आंबा कलम व माड यांना खत घालत असताना संशयीत आरोपी विजया रामकृष्ण कुर्ले व रामकृष्ण व्दारकानाथ कुर्ले हे फिर्यादी काम करत असलेल्या ठिकाणी आले व त्यांनी फिर्यादी याला शिवीगाळ करुन जिवे मारण्याची धमकी दिली व मोठ मोठ्याने आरडाओरड करु लागले ते ऐकुन त्यांचा मुलगा संशयीत आरोपी योगेश्वर रामकृष्ण कुर्ले हा हातात लोखंडी पारय घेवुन आला व त्याने जिवे मारण्याची धमकी देवुन फिर्यादीच्या हातावर लोखंडी पारय मारुन दुखापत केली. त्यावेळी हेमकांत रामकृष्ण कुर्ले व हेमांगी हेमकांत कुर्ले हे हातात लाकडी दांडा घेवुन आली व त्यांनी देखील फिर्यादी याला शिवीगाळ करुन मारहाण केली.तसेच दिपक रामकृष्ण कुर्ले यांनी देखील फिर्यादी याला शिवीगाळ केली अशी तक्रार फिर्यादी याने वेंगुर्ला पोलिस ठाण्यात दिल होती. फिर्यादीच्या तक्रारीवरुन संशयीत आरोपी विरुध्द भा.द.वि. कलम १४३, १४४, १४७, १४८, १४९, ३२३, ३२४,४२७,५०४,५०६ अंतर्गत गुन्हा नोंद करण्यात आला होता.तर संशयीत आरोपी रामकृष्ण व्दारकानाथ कुर्ले, विजया रामकृष्ण कुर्ले, योगेश्वर रामकृष्ण कुर्ले,हेमकांत रामकृष्ण कुर्ले, हेमांगी हेमकांत कुर्ले, दिपक रामकृष्ण कुर्ले यांच्या विरुद्ध गुन्हा नोंद झाला होता.व त्यांची नंतर जामिनावर मुक्तता करण्यात आली होती.मात्र सदर प्रकरणी वेंगुर्ला न्यायालयाने संबधीत गुन्ह्यातील साक्षीदार व साक्षी पुरावे तपासून व संशयीत आरोपीच्या वतीने ॲड. मनीष सातार्डेकर यांनी आरोपीची मांडलेली बाजू योग्य मानून व आरोपीच्या वतीने केलेला युक्तीवाद ग्राह्य मानून संशयीत आरोपी विरुध्द गुन्हा शाबीत होत नसल्याच्या कारणाने सबळ पुराव्या अभावी सर्व संशयीत आरोपी याची दि.२९ जून २०२४ रोजी निर्दोष मुक्तता केली आहे.