🛑होडी दुर्घटनेतिल किशोर चोडणेकर यांचा मृतदेह १३ दिवसांनी अलिबाग किनाऱ्यावर सापडला..

✍🏼लोकसंवाद /- मालवण.

तळाशील खाडीपात्रात होडी उलटल्याने पाण्यात बुडून बेपत्ता झालेल्या किशोर महादेव चोडणेकर (५५) या मच्छीमाराचा तब्बल १३ दिवसांनी मृतदेह सापडला आहे. किशोर चोडणेकर हे आठ जूनच्या रात्री समुद्रात मासेमारीसाठी गेले असता होडी उलटून बेपत्ता झालें होते. तळाशीलपासून ४०० किमीवर असलेल्या रेवदांडा (अलिबाग) किनाऱ्यावर मृतदेह सडलेल्या अवस्थेत सापडला. त्यांच्या अंगातील कपड्यावरून ओळख पटली असून चोडणेकर यांच्या नातेवाईकांना त्या ठिकाणी पाठविण्यात आल्याची माहिती पोलीस निरीक्षक प्रवीण कोल्हे यांनी दिली आहे. तळाशील येथील किशोर महादेव चोडणेकर (५५) हे ८ जून रोजी मुलगा लावण्य किशोर चोडणेकर (१४) वर्षे आणि खलाशी धोंडीराज परब (५५ रा. तारकर्ली) यांसह तळाशील खाडीमध्ये छोटी होडी घेऊन मासेमारीसाठी गेले होते. सदर मच्छीमार सर्जेकोट तळाशील येथे मच्छीमारी करताना रात्री नऊ वाजण्याच्या सुमारास होडी उलटली. यात तिघेजण समुद्रात बुडाले होते. लावण्य हा पोहत किनाऱ्यावर आला होता. तर बेपत्ता धोंडीराज यांचा मृतदेह घटनेच्या दुसऱ्या दिवशी सापडला. मात्र, किशोर यांचा अद्यापही शोध लागला नव्हता. स्थानिक ग्रामस्थ, शोधपथक, पोलीस तसेच प्रशासन यंत्रणा, कोस्टगार्ड हॅलिकॉ प्टर तसेच जिल्हा पोलीस प्रशासन टीमने ड्रोनद्वारे शोध मोहीम राबविली होती. दरम्यान, शुक्रवारी सकाळी रेवदांडा समुद्रकिनारी अज्ञात मृतदेह मिळून आला. या मृतदेहाच्या अंगावर असलेल्या टी शर्टवर ‘घाटकोपर भटवाडी साईदर्शन’ असा उल्लेख असल्याने हा फोटो घाटकोपरमध्ये व्हायरल झाला. त्यानंतर हा मृतदेह चोडणेकर यांचा असल्याचे स्पष्ट झाले.