🛑अपघात प्रकरणातील संशयीत आरोपीची निर्दोष मुक्तता..

✍🏼लोकसंवाद /- वेंगुर्ला.

अपघात प्रकरणातील संशयीत आरोपी अक्षय मिलींद मंत्री (२५ आरवली) याची वेंगुर्ला न्यायालयाचे न्यायाधीश डी.वाय.रायरीकर यानी सबळ पुराव्या अभावी निर्दोष मुक्तता केलेली आहे.संशयीत आरोपीच्या वतीने ॲड.मनीष सातार्डेकर यांनी
काम पाहीले.दि. ०६/११/२०१८ रोजी संशयीत आरोपी व फिर्यादी यांच्या दुचाकीमध्ये मोचेमाड घाटी येथे अपघात झाला होता.सबब कणकवली तालुक्यातील कसवण येथील फिर्यादी अनिकेत प्रमोद गावकर (२८ कसवण) याने अशी फिर्यादी दिली होती.की फिर्यादी हे,दि.०६/११/२०१८ रोजी कणकवली येथुन रेडी येथे त्यांच्या दुचाकीने मामासोबत मामाच्या मित्राच्या घरी गेले होते.परत येतेवेळी त्याच्या व संशयीत आरोपीच्या दुचाकी गाडीचा मोचेमाड घाटी येथील वळणावर सायंकाळी ०५.४५ च्या सुमारास अपघात झाला व सदरच्या अपघातामध्ये फिर्यादी फिर्यादीचा मामा तसेच आरोपी याना गंभीर स्वरुपाची दुखापत झाली व त्यांना रुग्णालयात भरती करावे,लागले होते.

सदर अपघातास संशयीत आरोपी जबाबदार आहे अशी फिर्याद फिर्यादी यांनी पोलिसात दिली होती.फिर्यादीच्या फिर्यादीवरुन संशयीत आरोपी याच्या विरुद्ध,भा.द.वि कलम २७९, ३३७, ३३८ तसेच मोटर वाहन अधिनियम कलम १८४, ३/१८१,३९/१९२, १४६/१९६ अंतर्गत गुन्हा नोंद झाला होता व संशयीताची जामिनावर मुक्तता करण्यात आली होती.मात्र सदर प्रकरणी वेंगुर्ला न्यायालयाने संबधीत गुन्ह्यातील साक्षी पुरावे तसेच,साक्षीदार तपासून व संशयीत आरोपीच्या वतीने ॲड. मनीष सातार्डेकर यांनी आरोपीची मांडलेली बाजू योग्य मानून व आरोपीच्या वतीने केलेला युक्तीवाद ग्राह्य मानून आरोपी विरुध्द गुन्हा शाबीत होत नसल्याच्या कारणाने संशयीत आरोपी याची सबळ पुराव्या अभावी दि.२०/०६/२०२४ रोजी निर्दोष मुक्तता केली आहे.