🛑सावंतवाडीतील प्रश्न सोडवण्यासाठी बाहेरच्या लोकांची गरज नाही,त्यासाठी पालकमंत्री रविंद्र चव्हाण,मंत्री दीपक केसरकर हे समर्थ आहेत.;उपाध्यक्ष संजू परब.

▪️माजी आमदार राजन तेली व भाजपा युवा मोर्चाचे प्रदेश उपाध्यक्ष विशाल परब यांच्यावर संजू परब यांनी नाव न घेता टिका..

✍🏼लोकसंवाद /- सावंतवाडी.

सावंतवाडी येथील शहरासह तालुक्यातील प्रश्न सोडवण्यासाठी आम्हाला बाहेरच्या लोकांची गरज नाही पालकमंत्री रवींद्र चव्हाण आणि शालेय शिक्षण मंत्री दीपक केसरकर यांच्यावर आमचा विश्वास असून त्यांच्या माध्यमातून येत्या चार दिवसात तालुक्यातील वीज प्रश्न सुटलेला असेल असा दावा माजी नगराध्यक्ष तथा भारतीय जनता पार्टीचे जिल्हा उपाध्यक्ष संजू परब यांनी केला. तर ज्यांनी शहरातील अंडरग्राउंड वीज वाहिन्यांसाठी आलेले ११ कोटी रुपये परतून लावले त्या बबन साळगावकर यांना वीज प्रश्नावर बोलण्याचा नैतिक अधिकार नाही तर ज्या लोकांनी नारायण राणे आणि मोदी सरकारच्या विरोधात काम केले अशांच्या मांडीला मांडी लावून बसणे योग्य नाही असेही परब म्हणाले.

परब पुढे म्हणाले की, विजेच्या प्रश्नावर आपण वेळोवेळी वीज अधिकार्‍यांशी चर्चा केली आहे.आम्ही प्रश्न सोडवण्यास धन्यता मानतो. प्रसिद्धीसाठी आम्ही हपापलेलो नाही. भविष्यात आम्हीही जनतेच्या प्रश्नावर आवाज उठवणार आहोत. परंतु आम्हाला अन्य पक्षांच्या कुबड्याची गरज लागणार नाही.आम्ही भारतीय जनता पक्ष जनतेचा प्रश्न सोडवण्यास सक्षम आहोत.कधीही सर्वपक्षीयांना हाक देण्याची पाळी आमच्यावर येणार नाही. दुसरीकडे सावंतवाडी शहराच्या अंडरग्राउंड वीज वाहिन्यांसाठी आलेले ११ कोटी रुपये खर्च न केल्याने परत पाठवण्यास जबाबदार असलेले माजी नगराध्यक्ष बबन साळगावकर यांनी सावंतवाडी शहरातील वीज प्रश्नावर बोलणे हे हास्यास्पद असून त्यांना कुठलाही नैतिक अधिकार नाही.त्यामुळे त्यांनी या विषयावर न बोललेलेच बरे.अशी टिका संजू परब यांनी केली.त्यामुळे आता सावंतवाडीत स्थानिक भाजपमधील मतभेद चव्हाटय़ावर आलेला दिसून आला आहे.