🛑निवृत्ती नंतर ड्युटी बजावणारा “एक्साईज” अधिकारी वादातत,खात्यातच उलट सुलट चर्चा..

✍🏼लोकसंवाद /- सावंतवाडी.

राज्य उत्पादन शुल्कच्या खात्यातून निवृत्त झालेले अधिकारी संजय मोहिते हे पुन्हा ड्युटी बजावत असल्यामुळे एक्साईज खात्यातच उलट सुलट चर्चा आहे. त्याच्यामागे नेमके कोण? त्यांचे पुन्हा त्या ठिकाणी नाक्यावर राहण्याचे कारण काय? असा सवाल त्यांच्याकडून उपस्थित होत आहे. दरम्यान “त्या” अधिकार्‍यांची नेमकी भूमिका काय? अशा प्रकारे ते निवृत्ती नंतर येवू शकतात का? या प्रकाराची चौकशी करण्यात यावी, अशी मागणी बांदा येथील सामाजिक कार्यकर्ते हेमंत वागळे ययांनी राज्य उत्पादन शुल्कच्या आयुक्तांकडे केली आहे.

याबाबत त्यांनी ईमेलच्या माध्यमातून वरिष्ठ स्तरावर तक्रारी केल्या असून त्या अधिकाऱ्याला थारा देणाऱ्या सद्यस्थितीत कार्यरत असलेल्या अधिकाऱ्यांची चौकशी करुन त्यांच्यावर कारवाई करण्यात यावी, अशी मागणी त्यांनी केली आहे. त्यांनी दिलेल्या माहितीनुसार राज्य उत्पादन शुल्क विभागाच्या इन्सुली येथील तपासणी नाक्यावर निरिक्षक म्हणून कार्यरत असलेले संजय मोहिते हे एक महिन्यापुर्वी निवृत्त झाले. मात्र लोकसभा निवडणूकीच्या पार्श्वभूमीवर सुरू असलेल्या एका कारवाईतील छायाचित्रात मोहीते दिसून आले. हा फोटो बातम्यांच्या माध्यमातून व्हायरल झाल्यानंतर खात्यात कार्यरत असलेल्या काही कर्मचाऱ्यांनीच आपले त्याकडे लक्ष वेधले. यात संबंधित अधिकारी निवृत्त झालेला असताना ते पुन्हा त्या ठिकाणी कसे काय येवू शकतात? असा त्यांचा प्रश्न होता. त्यामुळे झालेल्या प्रकाराबाबत त्यांनी इन्सुली येथील स्थानिक अधिकाऱ्यांना माहिती विचारली असता त्यांनी उडवाउडवीची उत्तरे दिली. त्यामुळे संतप्त झालेल्या श्री. वागळे यांनी राज्य उत्पादन शुल्कच्या वरिष्ठ अधिकाऱ्यांकडे ही तक्रार केली आहे. तसेच या प्रकाराची चौकशी व्हावी, अशी मागणी केली आहे. याबाबतचे निवेदन त्यांनी प्रसिध्दीस दिले आहे.

दरम्यान याबाबत दुसरी बाजू जाणून घेण्यासाठी सद्यस्थितीत कार्यभार असलेले अधिकारी प्रदीप रासकर यांच्याशी संपर्क साधला असता ते म्हणाले, मोहिते हे महिनाभरापूर्वी निवृत्त झाले आहेत. ते आपल्या पेन्शन तसेच अन्य उर्वरीत कामासाठी त्या ठिकाणी आले होते. त्याच वेळी कारवाईत पकडण्यात आलेला मुद्देमाल व संशयित त्या ठिकाणी होता. त्यामुळे जुने सहकारी म्हणून त्यांना आम्ही फोटोत घेतले. त्यात प्रश्न उपस्थित करण्यासारखे काहीही नाही. लोकसभेच्या पार्श्वभूमीवर आम्ही अलर्ट आहोत आणि कारवाईत सातत्य आहे.