🛑ठाकरे गटाने लोकसभेचे ११ उमेदवार जवळपास निश्‍चित..

सिंधुदुर्ग – रत्नागिरीतुन विनायक राऊत तर,रायगड मधुन अनंत गीते..

✍🏼लोकसंवाद /- सिंधुदुर्ग.

महाविकास आघाडीमध्ये जागा वाटपाची चर्चा अंतिम टप्प्यात असतानाच शिवसेनेच्या ठाकरे गटाने आपले ११ उमेदवार जवळपास निश्‍चित केल्याचे वृत्त आहे.रत्नागिरी-सिंधुदुर्ग लोकसभा मतदारसंघातून विद्यमान खासदार विनायक राऊत तर कोकणातीलच रायगड लोकसभा मतदार संघासाठी अनंत गीते यांच्यासह ठाणे मतदारसंघातून विद्यमान खासदार राजन विचारे हे लढणार असल्याची माहिती शिवसेनेच्या सूत्रांकडून मिळाली आहे.

मुंबईमध्ये शिवसेना ठाकरे गट ४ जागा लढवण्याच्या तयारीत असला तरी त्यातील ३ उमेदवार निश्‍चित झाले आहेत. वायव्य मुंबईतून अमोल गजानन कीर्तीकर, तर दक्षिण मुंबईतून खासदार अरविंद सावंत यांचं नाव निश्‍चित झाल्याचे वृत्त आहे. ईशान्य मुंबईतून संजय दिना पाटील यांना रिंगणात उतरवण्यात येणार आहे. छत्रपती संभाजीनगरमधून चंद्रकांत खैरे यांच्या नावावरही शिक्कामोर्तब करण्यात आलं असल्याची माहिती आहे.

हे असतील उमेदवार १) शिर्डी – भाऊसाहेब वाकचौरे, २) बुलढाणा – नरेंद्र खेडेकर, ३) ईशान्य मुंबई – संजय दिना पाटील, ४) रायगड – अनंत गीते, ५) रत्नागिरी-सिंधुदुर्ग – विनायक राऊत, ६) दक्षिण मुंबई – अरविंद सावंत ७) वायव्य मुंबई – अमोल कीर्तीकर, ८) संभाजीनगर -चंद्रकांत खैरे, ९) धाराशिव – ओमराजे निंबाळकर, १०) परभणी – संजय जाधव, ११) ठाणे – राजन विचारे २३ जागांची मागणी आगामी लोकसभा निवडणूक ही महाविकास आघाडीच्या माध्यमातून लढवण्याचं शिवसेना ठाकरे गट, राष्ट्रवादी शरद पवार गट आणि कॉंग्रेसने ठरवलं आहे. त्यासाठी जागावाटपाचीही चर्चा सुरू आहे. यामध्ये शिवसेना ठाकरे गटाने ४८ पैकी २३ जागांची मागणी केली आहे. या जागावाटपावर अंतिम शिक्कामोर्तब होण्याआधीच शिवसेना ठाकरे गटाकडून ११ जागांवर नावं फायनल करण्यात आल्याची माहिती आहे. त्यामुळे लोकसभेसाठी ठाकरे गटाने आघाडी घेतल्याचं दिसून येतंय. ठाण्यातून राजन विचारे लढणार शिवसेनेत झालेल्या बंडाचं मूळ ठाण्यात असून ठाणे हा एकनाथ शिंदे यांचा बालेकिल्ला असल्याचं मानलं जातंय. त्या ठिकाणाहून खासदार राजन विचारे यांना उमेदवारी देण्यात येणार असून त्यांनी तयारीही सुरू केली आहे.