🛑एअरगनचा “छर्रा” मारून जखमी केल्याप्रकरणी तळवडेतील एकावर गुन्हा दाखल…

✍🏼लोकसंवाद /- सावंतवाडी.

एअरगनचा छर्रा मारून एकाला गंभीर दुखापत केल्याप्रकरणी तळवडे येथील अंकुश सिताराम लोके (वय २४, रा. तळवडे-लोकेवाडी) याच्या विरोधात येथील पोलीस ठाण्यात गुन्हा दाखल करण्यात आला आहे. याबाबतची तक्रार जखमी मोहन यांचा मुलगा महेश मालवणकर यांनी दिली आहे. दरम्यान माकडांना हकलण्यासाठी एअरगन चालवत असताना छर्रा झाडाला आदळून आपल्या वडीलांना बसला असे, त्यांनी तक्रारीत म्हटले आहे. त्यानुसार हा गुन्हा दाखल करण्यात आला आहे. याबाबतची माहिती पोलीस हवालदार सतीश नाईक यांनी दिली.

याबाबतची तक्रार जखमी मोहन यांचा मुलगा महेश यांनी दिली आहे. त्यांच्या म्हणण्यानुसार रात्री ८ वाजण्याच्या सुमारास आपले वडिल घरी येत असताना घराच्या बाजूला कुत्रे जोरजोरात भुंकताना दिसले. यावेळी अचानक त्यांच्या पाठिवर काहीतरी आदळले व ते जोरदार ओरडले. यावेळी अंकुश लोके यांनी त्या ठिकाणी धावत येऊन आपल्या हातातून एअरगनचा छंद निसटला, असे सांगितले. यावेळी त्यांच्या हातात एअरगन होती. दरम्यान आपण माकडांना हाकलण्यासाठी हा एअरगनचा छर्रा फायर केला होता. तो त्यांच्या पाठीला लागला असावा, असे त्यांनी सांगितले. दरम्यान वडिलांना काही त्रास होत नसल्यामुळे घरगुती उपचार करून त्यांना घरातच झोपवण्यात आले. दरम्यान आज सकाळी त्यांना खूप त्रास होत असल्यामुळे अधिक उपचारासाठी येथील कुटीर रुग्णालयात दाखल करण्यात आले. यावेळी तेथील वैद्यकीय अधिकाऱ्यांनी तपासणी केली असता त्यांच्या पाठीत छर्रा असल्याचे दिसून आले. त्यानुसार त्यांना अधिक उपचारासाठी गोवा-बांबूळी येथे हलविण्याचा सल्ला देण्यात आला. दरम्यान याप्रकरणी आपण तक्रार देत असून लोके याच्या हातात असलेल्या एअरगन मधील छर्रा उडल्याने आपल्या वडिलांना दुखापत झाली, असा दावा त्यांनी केला आहे. त्यानुसार त्यांनी दिलेल्या तक्रारीनुसार अंकुश सिताराम लोके याच्यावर गुन्हा दाखल करण्यात आल्याचे हवालदार देसाई यांनी सांगितले.