🛑जिल्ह्यातील पाच दिवसांच्या गणपतींला निरोप..

✍🏼लोकसंवाद /- सिंधुदुर्ग.
     
सिंधुदुर्ग जिल्ह्यातील तालुका आणि ग्रामीण भागात शनिवारी पाच दिवसांच्या गणपतीला भावूक वातावरणात निरोप देण्यात आला.सायंकाळी उशिरा तसेच रात्रौ पर्यंत भाविक गणपती विसर्जनात सहभागी झाले होते.महाराष्ट्र राज्याचे उद्योगमंत्री उदय सामंत यांच्या वेंगुर्ला येथील स्थानापन्न गणपतीचे पाचव्या दिवशी उत्साहात विसर्जन करण्यात आले.चौदा विद्या चौसष्ट कलांचा अधीपती असलेल्या श्री गणेशाचे मंगळवारी (19 सप्टेंबट) भाद्रपद चतुर्थीला आगमन झाले. यंदा श्री गणेश चतुर्थी सुमारे 15 दिवस उशिराने आल्याने बहुसंख्य गणपती शाळेमध्ये गणेशमूर्ती वेळीच साकारल्या गेल्या.शनिवारी पाच दिवसांनी ‘गणपती बाप्पा मोरया ,मंगलमूर्ती मोरया , पुढच्या वर्षी लवकर या’ च्या जयघोषात पाच दिवसांच्या बाप्पाला निरोप देण्यात आला. शहरातील वेंगुर्ले प्रादेशिक फळ संशोधन केंद्र व वेंगुर्ले विज वितरण मधील या दोन सार्वजनिक गणपतींचे पाचव्या दिवशी विसर्जन करण्यात आले.

तर गाडीअड्डा येथील सार्वजनिक गणपतीचे अनंत चतुर्दशी पर्यंत व वेंगुर्ले पोलिस स्थानकातील सार्वजनिक गणपती 17 दिवस विराजमान असणार आहे. तर 9 , अनंत चतुर्दशी , 11 दिवसापर्यंत शहरात व तालुक्यात गणपती विराजमान असणार आहेत.वेंगुर्ले शहरात गणेशोत्सव कालावधीत नगरपरिषद व पोलिस प्रशासन यांच्या वतीने बाजारपेठ व वाहतूक व्यवस्था यांचे सुयोग्य नियोजन करण्यात आले आहे. नगरपरिषदेच्या वतीने शहरातील मांडवी ,वडखोल ,भटवाडी , आडी पूल ,साकव , पत्रा पूल आदी 6 विसर्जन स्थळ ठिकाणी निर्माल्य कलश ची व्यवस्था करण्यात आली होती. गणेशोत्सव कालावधीत वीज वितरणच्या चांगल्या सेवेबद्दल भाविकातून समाधान व्यक्त करण्यात आले. वेंगुर्ले बस स्थानका मार्फत आज रविवार (24 सप्टेंबर) पासून अनंत चतुर्दशी पर्यंत चाकरमानी यांच्या परतीच्या प्रवासासाठी वेंगुर्ले ते मुंबई सेंट्रल , परेल ,बोरिवली ,अर्नाळा व पुणे आदी 5 ठिकाणी 14 बसेस सुटणार आहेत.वेंगुर्ले ते मुंबई सेंट्रल दुपारी 3.30,3.45,4, 4.15 वा., वेंगुर्ले ते परेल दुपारी 3, 3.30 ,4 वा., वेंगुर्ले ते बोरिवली दुपारी 3.30,3.45,4 वा., वेंगुर्ले ते अर्नाळा (विरार) सायंकाळी 4 वा., वेंगुर्ले ते पुणे सायंकाळी 4, 4.15,4.30 वा. अशा एस.टी. बसेस सुटणार आहेत.