🛑केळुसच्या ‘तारादेवी महिला फुगडी ग्रुप’ची जिल्हास्तरीय फुगडी स्पर्धेत घवघवीत यश!

✒️लोकसंवाद /- मालवण.

महाराष्ट्राची पारंपरिक सांस्कृतिक कला असलेल्या फुगडीच्या क्षेत्रात केळुस येथील ‘तारादेवी महिला फुगडी ग्रुप’ने आपल्या उत्कृष्ट कामगिरीची परंपरा कायम राखत दोन मोठ्या जिल्हास्तरीय स्पर्धांमध्ये चमकदार यश संपादन केले आहे. या ग्रुपच्या महिलांनी आपल्या लयबद्ध आणि उत्साही फुगडीच्या सादरीकरणाने उपस्थितांची मने जिंकली.
प्राप्त माहितीनुसार, इनामदार श्री देव रामेश्वर संस्थान, कसबा आचरे (मालवण) येथे आयोजित जिल्हास्तरीय फुगडी ग्रुप स्पर्धेत ‘तारादेवी महिला फुगडी ग्रुप केळुस’ने द्वितीय क्रमांक पटकावला आहे. तसेच, चिंदर तेरई तरुण सेवा मंडळ आयोजित जिल्हास्तरीय फुगडी स्पर्धेतही याच ग्रुपने आपल्या उत्कृष्ट कलेचे प्रदर्शन करत तृतीय क्रमांक पटकावला आहे.
या दोन्ही स्पर्धांमध्ये केळुस गावाचे नाव उज्ज्वल केल्याबद्दल ‘तारादेवी महिला फुगडी ग्रुप’च्या सर्व महिला सदस्यांवर सर्व स्तरातून अभिनंदनाचा वर्षाव होत आहे. ग्रामीण संस्कृतीच्या जतनासाठी आणि महिलांच्या कलागुणांना वाव मिळण्यासाठी अशा स्पर्धांचे यश अत्यंत प्रेरणादायी ठरत आहे.