🛑सासोली येथे नूतन तलाठी कार्यालयाचे पालकमंत्री नितेश राणे यांच्या हस्ते लोकार्पण.

✒️लोकसंवाद /- दोडामार्ग.

दोडामार्ग तालुक्यातील मौजे सासोली येथे जिल्हा नियोजन समितीच्या निधीतून १४.५८ लाख रुपये खर्चून उभारण्यात आलेल्या नूतन तलाठी कार्यालयाचे लोकार्पण राज्याचे मत्स्यव्यवसाय व बंदरे मंत्री तथा सिंधुदुर्ग जिल्ह्याचे पालकमंत्री नितेश राणे यांच्या हस्ते करण्यात आले. सार्वजनिक बांधकाम विभागामार्फत या कार्यालयीन इमारतीचे बांधकाम करण्यात आले आहे.

जिल्हा नियोजन समितीच्या माध्यमातून गतिमान प्रशासन तथा आपत्कालीन व्यवस्थेचे बळकटीकरण या योजनेंतर्गत या कामासाठी प्रशासकीय मान्यता देण्यात आली होती. सार्वजनिक बांधकाम विभागाच्या देखरेखीखाली आरसीसी फ्रेम, लाल विटांच्या भिंती, अंतर्गत व बाह्य गिलावा, व्हिट्रिफाइड फरशी आणि रंगकाम अशा कामांचा समावेश असलेल्या या इमारतीचे बांधकाम पूर्ण झाले आहे. नव्या कार्यालयामुळे सासोली परिसरातील नागरिकांना महसुली कामकाजासाठी आवश्यक सुविधा उपलब्ध होणार असून, शासकीय सेवा अधिक सुलभतेने मिळण्यास मदत होणार आहे.

या लोकार्पण सोहळ्यास जिल्हा परिषद अध्यक्ष प्रमोद कामत, जिल्हाधिकारी तृप्ती धोडमिसे, दोडामार्ग पंचायत समितीच्या सभापती पार्वती गवस, सावंतवाडीचे उपविभागीय अधिकारी वीरसिंग वसावे, सार्वजनिक बांधकाम विभागाच्या कार्यकारी अभियंता पूजा इंगवले यांच्यासह दोडामार्गचे तहसीलदार राहुल गुरव, सार्वजनिक बांधकाम उपविभागाच्या उपविभागीय अधिकारी सीमा गोवेकर उपस्थित होते. यावेळी स्थानिक लोकप्रतिनिधी, शासकीय अधिकारी, कर्मचारी आणि ग्रामस्थ मोठ्या संख्येने उपस्थित होते.

नूतन तलाठी कार्यालयात महसूल विभागाच्या ई-प्रणालीविषयक सुविधांची माहिती नागरिकांना सहज उपलब्ध व्हावी, यासाठी क्यूआर कोड लावण्यात आले आहेत. पालकमंत्री नितेश राणे यांनी या क्यूआर कोडचे स्कॅनिंग करून संबंधित सुविधांची पाहणी केली आणि डिजिटल माध्यमातून महसूलविषयक सेवा उपलब्ध करून देण्याच्या उपक्रमाची माहिती घेतली. ई-प्रणालीच्या माध्यमातून नागरिकांना महसूलविषयक माहिती मिळविणे अधिक सुलभ होण्यास मदत होणार आहे.