🛑जि.प. च्या.निधी वाटपातील पक्षपाताविरोधात रुपेश पावसकर यांची उच्च न्यायालयात धाव;

◼️जिल्हा परिषद स्वनिधी आणि 15 व्या वित्त आयोगाच्या निधी वाटपात दुजाभावाचा केल्याचा आरोप.

✒️लोकसंवाद /- सिंधुदुर्ग.

सिंधुदुर्ग जिल्हा परिषदेत विकास निधी वाटप करताना विरोधी आणि अपक्ष सदस्यांच्या मतदारसंघांवर अन्याय होत असल्याचा आरोप करत अपक्ष जिल्हा परिषद सदस्य रुपेश पावसकर यांनी मुंबई उच्च न्यायालयाच्या कोल्हापूर सर्किट बेंचकडे धाव घेतली आहे. जिल्हा परिषद स्वनिधी आणि 15 व्या वित्त आयोगाच्या निधी वाटपातील कथित पक्षपाती धोरणाविरोधात त्यांनी याचिका दाखल केली आहे.

या याचिकेची प्रत जिल्हा परिषदेचे मुख्य कार्यकारी अधिकारी यांना देण्यात आली आहे. त्यामुळे या प्रकरणात जिल्हा परिषद प्रशासन काय भूमिका घेते, याकडे लक्ष लागले आहे.रुपेश पावसकर यांच्या वतीने अॅड. दत्ता पवार आणि अॅड. सोनाली पवार यांनी ही याचिका दाखल केली आहे.विरोधी सदस्यांनी सुचविलेल्या विकासकामांना डावलले जात असून,त्यांच्या मतदारसंघांतही सत्ताधारी सदस्यांच्या शिफारशींनुसार कामांना मंजुरी दिली जात असल्याचा आरोप पावसकर यांनी केला आहे.

विकास निधीचे वाटप करताना सर्व सदस्यांच्या मतदारसंघांना समान न्याय मिळणे अपेक्षित असताना पक्षीय राजकारणातून निधी वितरणात दुजाभाव होत असल्याचा मुद्दा त्यांनी उपस्थित केला आहे. या याचिकेमुळे जिल्हा परिषदेतील निधी वाटपाचा प्रश्न ऐरणीवर आला असून, न्यायालयीन प्रक्रियेतून या प्रकरणात काय निष्पन्न होते, याकडे राजकीय वर्तुळाचे लक्ष लागले आहे.