🛑अंकुर महिला वसतिगृहात ‘लोकसंवाद-२०२६’;महिलांच्या सुरक्षिततेसह शासकीय योजनांबाबत मार्गदर्शन.

✒️लोकसंवाद /- सावंतवाडी.

‘लोकसंवाद-२०२६’ उपक्रमांतर्गत सावंतवाडी येथील अंकुर महिला वसतिगृहात महिलांसाठी मार्गदर्शनपर कार्यक्रमाचे आयोजन करण्यात आले. माहिती व जनसंपर्क महासंचालनालयाच्या जिल्हा माहिती कार्यालय, सिंधुदुर्ग आणि जिल्हा प्रशासनाच्या संयुक्त विद्यमाने आयोजित या कार्यक्रमात महिलांच्या सुरक्षिततेसाठी आवश्यक उपाययोजना तसेच महिला व बालविकास विभागामार्फत राबविण्यात येणाऱ्या विविध शासकीय योजनांची माहिती देण्यात आली.

यावेळी महिला व बाल विकास अधिकारी बापू शिणगारे यांनी महिलांच्या सुरक्षिततेसाठी उपलब्ध असलेल्या उपाययोजना, शासकीय यंत्रणेमार्फत दिले जाणारे सहकार्य आणि महिलांसाठीच्या विविध योजनांबाबत मार्गदर्शन केले. अधीक्षक बी. जी. काटकर यांनीही वसतिगृहातील महिलांना आवश्यक सूचना व मार्गदर्शन केले. जिल्हा माहिती अधिकारी सचिन अडसूळ यावेळी उपस्थित होते.

‘लोकसंवाद-२०२६’च्या माध्यमातून शासनाच्या योजना व उपक्रमांची माहिती थेट लाभार्थी घटकांपर्यंत पोहोचविण्यासोबतच त्यांच्या प्रश्नांना व अडचणींना जाणून घेण्यावर भर देण्यात येत आहे.