🛑वेताळ बांबर्डे येथे कारच्या बॉनेटमध्ये सापडला सोंगट्या जातीचा साप.

◾सर्पमित्र दिवाकर बांबर्डेकर यांनी पकडून सोडले नैसर्गिक अधिवासात..

✒️लोकसंवाद /- कुडाळ.

कुडाळ तालुक्या नजीक असलेल्या मुंबई -गोवा हायवेवर वेताळ बांबर्डे-पावशी सीमेवर कारच्या बॉनेटमध्ये सोंगट्या जातीचा साप सापडला आहे. हा साप सर्पमित्र दिवाकर बांबर्डेकर यांनी नैसर्गिक अधिवासात सोडला आहे.ही घटना आज सोमवारी सकाळी ९.३० च्या सुमारास घडली

कारच्या बॉनेटमध्ये लपून बसलेला साप अचानक समोरील काचेवर आल्याचे चालकाच्या निदर्शनास आले. त्याने प्रसंगावधान दाखवून कार महामार्गाच्या बाजूला थांबवून सापाची शेपटी पकडून ठेवली.याबाबतची माहिती स्थानिक ग्रामस्थ रिझवान उस्मान शेख यांनी सर्पमित्र दिवाकर रमाकांत बांबर्डेकर (कुडाळ आरआरटी) यांना दिली. दिवाकर बांबर्डेकर यांनी तत्काळ घटनास्थळी येऊन त्या सापाला पकडून नैसर्गिक अधिवासात सोडले.हा साप बिनविषारी असून याला “तस्कर” असे म्हटले जाते.हा साप दिसण्यास सुंदर असून याचा उपद्रव नाही.हा साप प्रामुख्याने लहान उंदीर, पाली, सरडे, बेडूक आणि लहान पक्षी किंवा त्यांची अंडी खातो. घराच्या आसपास लपत-छपत येऊन पाली पकडण्याच्या त्याच्या या ‘चोरीसारख्या’ सवयीमुळे त्याला मराठीत ‘तस्कर’ (चोर) हे नाव पडले आहे अशी माहिती दिवाकर बांबर्डेकर यांनी दिली.