🛑कुडाळ येथील श्रीराम हॉस्पिटल येथे ‘टीबी मुक्त भारत अभियान’ अंतर्गत क्षय रुग्णांना पोषण आहार वाटप..

✒️लोकसंवाद /- समिल जळवी,कुडाळ.

आरोग्य विभागाच्या वतीने संपूर्ण देशात राबवल्या जाणाऱ्या ‘टीबी मुक्त भारत अभियाना’ला सिंधुदुर्ग जिल्ह्यात मोठा जनप्रतिसाद मिळत आहे. याच अभियानाचा एक महत्त्वाचा भाग म्हणून कुडाळ येथील “श्रीराम हॉस्पिटल, कुडाळ” येथे क्षय (टीबी) ग्रस्त रुग्णांना मोफत पोषण आहार किट्स वाटपाचा विशेष कार्यक्रम अत्यंत उत्साहात पार पडला.

या सामाजिक उपक्रमात खाजगी वैद्यकीय व्यावसायिक ‘डॉ. विशाखा पाटील’ यांनी पुढाकार घेत स्वतः ‘निक्षय मित्र’ म्हणून नोंदणी केली.सामाजिक बांधिलकीची जपणूक करत डॉ.विशाखा पाटील यांनी सिंधुदुर्ग जिल्ह्यातील “६ गरजू क्षय रुग्णांना दत्तक” घेतले असून त्यांच्या पूर्ण उपचार कालावधीत आवश्यक असणारा सकस आणि संतुलित पोषण आहार पुरवण्याची जबाबदारी स्वीकारली आहे.

या संपूर्ण उपक्रमाच्या नियोजनात आणि अंमलबजावणीत ‘जिल्हा शल्यचिकित्सक डॉ. श्रीपाद पाटील’ यांनी अत्यंत मोलाचे योगदान दिले. वैद्यकीय सेवेसोबतच टीबी मुक्त भारत अभियानाला बळ देण्यासाठी त्यांनी दाखवलेले विशेष स्वारस्य आणि मार्गदर्शन या कार्यक्रमासाठी अत्यंत महत्त्वपूर्ण ठरले. डॉ. श्रीपाद पाटील यांच्या सहकार्यामुळे आणि डॉ. विशाखा पाटील यांच्या पुढाकारामुळे जिल्ह्यातील क्षयमुक्त मोहिमेला नवीन दिशा मिळाली आहे.

◼️सामाजिक सहभागाचे आवाहन.

क्षयरोगाच्या उपचारात औषधोपचारांइतकाच सकस अ पौष्टिक आहाराचा वाटा अत्यंत महत्त्वाचा असतो. रुग्णांचा प्रतिकारशक्ती वाढून ते लवकर आजारमुक्त व्हावेत, या उद्देशाने हे पोषण आहार किट्स रुग्णांना वितरित करण्यात आले. याप्रसंगी बोलताना ‘डॉ. विशाखा पाटील’ यांनी आपली भूमिका मांडताना सांगितले की, “आरोग्य क्षेत्रातील एक घटक म्हणून समाजाचे देणे लागते”, याच भावनेतून मी ‘निक्षय मित्र’ म्हणून ६ रुग्णांच्या पोषण आहाराची जबाबदारी स्वीकारली आहे. टीबी आजाराशी लढणाऱ्या रुग्णांना केवळ औषधांचीच नव्हे तर योग्य पोषण आणि मानवी संवेदनशीलतेचीही गरज असते. सिंधुदुर्ग जिल्ह्यातील इतर खाजगी डॉक्टर्स, उद्योगपती, व्यापारी, सामाजिक संस्था आणि दानशूर व्यक्तींनीदेखील पुढे येऊन ‘निक्षय मित्र’ व्हावे आणि या अभियानात सक्रिय सहभाग नोंदवावा.

◼️प्रमुख मान्यवरांची उपस्थिती..

या कार्यक्रमाला आरोग्य विभागातील वरिष्ठ अधिकारी, पर्यवेक्षक आणि कर्मचाऱ्यांची प्रमुख उपस्थिती लाभली डॉ. जयवंत मोरे (जिल्हा क्षयरोग अधिकारी) श्री. नितीन नाईक (जिल्हास्तरीय पर्यवेक्षक),श्री. गणेश जाधव (जिल्हास्तरीय पर्यवेक्षक), श्री. सुरेश मोरजकर (जिल्हा पीपीएम समन्वयक),श्री. लक्ष्मण कदम (तालुका पर्यवेक्षक),श्रीमती ईश्वरी पालव (पीपीएसए स्टाफ),श्री. नासिर मकानदार (पीपीएसए स्टाफ)

◼️जिल्हा क्षयरोग अधिकाऱ्यांचे मनोगत

कार्यक्रमादरम्यान ‘जिल्हा क्षयरोग अधिकारी डॉ. जयवं मोरे’ यांनी उपस्थितांना संबोधित करताना सांगितले की, “टीबी” हा न घाबरता योग्य उपचारांनी पूर्णपणे बरा होणारा आजार आहे. डॉ. विशाखा पाटील आणि जिल्हा शल्यचिकित्सक डॉ. श्रीपाद पाटील यांनी दाखवलेली सामाजिक बांधिलकी अत्यंत कौतुकास्पद आणि इतरांसाठी प्रेरणादायी आहे. शासकीय यंत्रणेसोबतच जेव्हा खाजगी वैद्यकीय क्षेत्र आणि समाज एकत्र येतो, तेव्हाच कोणतेही अभियान यशस्वी होते. सर्वांच्या सहकार्याने आपण संपूर्ण सिंधुदुर्ग जिल्हा लवकरात लवकर टीबी मुक्त करू.

“कार्यक्रमाच्या शेवटी उपस्थित सर्व मान्यवर, आरोग्य कर्मचारी आणि लाभार्थी रुग्णांच्या प्रतिनिधींचे आभार मानण्यात आले. या उपक्रमामुळे जिल्ह्यातील टीबी रुग्णांना मोठा मानसिक आणि शारीरिक आधार मिळाला असून सर्व स्तरातून या उपक्रमाचे कौतुक होत आहे.