🛑मालवणमध्ये सफाई कामगाराला धमकी:संतप्त कर्मचाऱ्यांचे कामबंद आंदोलन.

✒️लोकसंवाद /- मालवण.

मालवण शहरातील रेवतळे येथे कचरा उचलण्याच्या कारणावरून स्थानिक नगरसेविकेच्या पतीने कंत्राटी सफाई कर्मचाऱ्याला मारहाणीची धमकी दिल्याचा प्रकार समोर आला आहे. या घटनेच्या निषेधार्थ संतप्त कंत्राटी सफाई कर्मचाऱ्यांनी तात्काळ कामबंद आंदोलन पुकारले. मात्र, पालिकेच्या सर्वसाधारण सभेनंतर आरोग्य सभापती पूनम चव्हाण यांनी कर्मचाऱ्यांची बाजू लावून धरली, तर संबंधित नगरसेविकेने या प्रकाराबद्दल दिलगिरी व्यक्त केल्याने अखेर या वादावर पडदा पडला.

पालिकेच्या स्वच्छता विभागाचे कंत्राटी सफाई कामगार नेहमीप्रमाणे सकाळी रेवतळे परिसरात कचरा उचलण्याचे काम करत होते. यावेळी तेथे आलेल्या स्थानिक नगरसेविका अनिता गिरकर यांच्या पतीने कंत्राटी सफाई कामगाराला थेट मारहाणीची धमकी दिली. या अरेरावीमुळे संतप्त झालेल्या सर्व कंत्राटी सफाई कामगारांनी एकत्र येत कामबंद आंदोलन छेडले आणि प्रशासनाचे लक्ष वेधले.

आज पालिकेची सर्वसाधारण सभा संपल्यानंतर आरोग्य सभापती पूनम चव्हाण यांनी तातडीने सफाई कामगारांची भेट घेऊन त्यांची बाजू जाणून घेतली. यावर कडक भूमिका घेत चव्हाण म्हणाल्या, लोकप्रतिनिधींच्या कोणत्याही नातेवाईकाला अशा प्रकारे कामगारांना धमकी देण्याचा अधिकार नाही. हा प्रकार खपवून घेतला जाणार नाही. मी पूर्णपणे सफाई कामगारांच्या पाठीशी उभी आहे.

या सर्व प्रकारावर माजी नगराध्यक्ष सुदेश आचरेकर यांनीही तीव्र नाराजी व्यक्त केली. घडलेला प्रकार पूर्णपणे चुकीचा असून यापुढे अशा घटना घडणार नाहीत, अशी ग्वाही त्यांनी दिली. या पार्श्वभूमीवर, नगरसेविका अनिता गिरकर यांनी स्वतः समोर येत घडलेल्या प्रकाराबद्दल जाहीर दिलगिरी व्यक्त केली. नगरसेविकेने दिलगिरी व्यक्त केल्याने अखेर सफाई कर्मचाऱ्यांनी आपले आंदोलन मागे घेतले आणि या वादावर यशस्वी तोडगा निघाला.