🛑जिल्हापरिषद पंचायत समितीच्या २७ जागांसाठी उद्या मतदान १५३ मतदान केंद्रे निश्चित तर,८५० अधिकारी – कर्मचारी नियुक्त: ३५० पोलिसांचा बंदोबस्त.

✍️लोकसंवाद /- कुडाळ.

कुडाळ तालुक्यातील ९ जिल्हा परिषद व १८ पंचायत समितीच्या जागांसाठी उद्या शनिवारी ७ फेब्रुवारी २०२६ रोजी मतदान होत आहे. या पार्श्वभूमीवर शुक्रवारी सकाळी कुडाळ मधून सर्व मतदान केंद्रावर मतदान मशीन व साहित्य रवाना करण्यात आले. कुडाळ तहसीलदार कार्यालय येथून मतदान यंत्रे व साहित्य ताब्यात घेत अधिकारी कर्मचारी मतदान केंद्रावर रवाना झाले. यावेळी पोलीस बंदोबस्त ठेवण्यात आला होता. निवडणूक निर्णय अधिकारी ऐश्वर्या काळुसे, सहाय्यक निवडणूक निर्णय अधिकारी सचिन पाटील, नायब तहसिलदार संजय गवस, निवासी नायब तहसीलदार अमरसिंह जाधव, पोलिस निरीक्षक राजेंद्र मगदूम, गटविकास अधिकारी प्रफुल्ल वालावलकर आदींसह अधिकारी व कर्मचारी उपस्थित होते.

जिल्हा परिषद व पंचायत समित्यांच्या सार्वत्रिक निवडणुकांसाठी कुडाळ तालुक्यात शनिवार, दि. ७फेब्रुवारी २०२६ रोजी सकाळी ७.३० ते सायंकाळी ५.३० या वेळेत मतदान होणार आहे. या निवडणुकीत जिल्हा परिषदेच्या ९ जागांसाठी २२ व पंचायत समितीच्या १८ जागांसाठी ४५ असे एकूण ६७ उमेदवार निवडणूक रिंगणात आहेत. कुडाळ तालुक्यातील १५३ मतदान केंद्रांवर एकूण १,१६,६३० मतदार मतदान करणार असून, त्यामध्ये ५८,०९९ महिला व ५८,५३१ पुरुष मतदारांचा समावेश आहे. मतदान प्रक्रिया सुरळीत पार पाडण्यासाठी तालुक्यात २४ क्षेत्रीय अधिकारी, १५३ केंद्राध्यक्ष, ४६० मतदान अधिकारी व प्रत्येक मतदान केंद्रावर शिपाई व व्यवस्थापक नेमण्यात आले आहेत. राखीव कर्मचाऱ्यांसह एकूण ८५० निवडणूक अधिकारी व कर्मचारी नियुक्त करण्यात आले आहेत. निवडणूक शांततेत पार पाडण्यासाठी ३५० पोलीस अधिकारी व कर्मचारी तसेच होमगार्डचा बंदोबस्त ठेवण्यात आला आहे. कोणत्याही आपत्कालीन परिस्थितीत तात्काळ कार्यवाहीसाठी तालुक्यात दोन जलद कृती पथकांची स्थापना करण्यात आली आहे. मतदारांना विशेष सुविधा देण्यासाठी पावशी-ढवणवाडी येथील मतदान केंद्र क्रमांक २८/१५ येथे ‘सखी मतदान केंद्र’, पिंगुळी येथील मतदान केंद्र क्रमांक ३१/०७येथे ‘आदर्श मतदान केंद्र’, तर माणगाव येथील मतदान केंद्र क्रमांक ३३/०५ येथे ‘सेल्फी मतदान केंद्र’ स्थापन करण्यात आले आहे. निवडणूक पथकांच्या दळण-वळणासाठी महाराष्ट्र राज्य परिवहन महामंडळाच्या २३ बसेस, २८ जीप तसेच इतर आवश्यक वाहनांची व्यवस्था करण्यात आली आहे. या वाहनांमधून अधिकारी-कर्मचारी मतदान यंत्रे व साहित्य घेऊन मतदान केंद्रावर पोचले. सोमवारी ९ फेब्रुवारीला मतमोजणी प्रक्रिया पार पडणार असल्याची माहीती प्रशासनाकडून देण्यात आली.